Кентау ҚПБ-ның кезекші бөліміне жергілікті тұрғын бос жайылымнан 25 жылқы жоғалғаны туралы арызданған. Бастапқыда арызданушы өздігінен бір апта бойы іздеген, алайда таба алмаған. Содан соң учаскелік полиция инспекторының көмегіне жүгінген. Бұл жайт аудандық полиция бөлімінде тіркеліп, жоғалған жылқыларды іздеу үшін учаскелік полиция инспекторы полиция капитаны Ерхат Мұсаев пен бірнеше мобильді топ жақын маңдағы барлық аумақтарды аралап, ауыл тұрғындарымен сұқбат жүргізеді, базарлар мен мал тасымалдайтын автокөліктерді тексереді.
Жедел шаралар нәтижесінде бірнеше күннен кейін Кентау ҚПБ-ның полицейлері 120 шақырым жердегі Қара тау бөктерінде жайылып жүрген жерінен жылқы үйірін тапты. Табылған 25 бас жылқы заңды иесіне қайтарылды, жәбірленуші азамат Кентаулық полицейлерге үлкен алғысын білдірді-деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
«Мен 25 жылқымды жоғалтып, өзіміздің аймақтың учаскелік полицейі Ерхат Мұсаевқа хабарласып, көмек сұрадым. Ол бірден жылқыларды іздей бастады және жылқыларымды тапты. Барша полиция қызметкерлеріне, Ерхат Мұсаевқа алғысымды білдіргім келеді. Сіздерге үлкен рахмет!»- деді ауыл тұрғыны полицейлерге.
Өз кезегінде Түркістан облысының полицейлері қырағы болу және малды жайылымда қараусыз қалдырмау қажеттігін ескертеді, өйткені сіздің малыңыз барымташылардың оңай олжасына әп-сәтте айналуы мүмкін. Сондықтан мүмкіндігінше, үй шаруашылығын сенімді қоршаумен қоршап, малды таңбалау және сырғалау қажет. Мал жоғалған немесе ұрланған жағдайда өз бетінше іздеп, уақыт жоғалтпастан, дереу полицияның «102» телефонына хабарласыңыздар.
ТО ПД-нің баспасөз қызметі
