Сауран аудандық ПБ-ға жергілікті тұрғын өзінің 2 бас сиырын белгісіз біреу ұрлап кеткендігі туралы айтып, шағымданған. Онда ауласында орналасқан мал қорасына заңсыз кірген күдікті сиырларды жымқырып, жалпы 600 000 теңге шығын келтіргені көрсетілген. Полиция қызметкерлері аталған жайтты ҚР ҚК-нің 188-1-бабы «Мал ұрлығы» қылмыстық құқық бұзушылығы бойынша СДТБТ-ға тіркеді— деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Орын алған ұрлық қылмысын ашу мақсатында, ауданның тәжірибелі полицейлерінен жедел-тергеу тобы құрылды. Тәртіп сақшылары оқиға орнын мұқият тексеріп, көрген-білген куәлардан жауап алды. Сонымен қатар іске белсене кіріскен саурандық сақшылар, мал сататын орындарды да шолып шықты. Осылайша жүргізілген тиянақты істің нәтижесінде мал ұрлығына қатысты күдікті екеу ұсталды. Олар жергілікті тұрғын болып шықты. Қазіргі таңда аталған жайтқа байланысты тергеу амалдары жүргізілуде. Күдіктілер қамауда.
Сонымен қатар 2 орта жастағы күдіктілердің бұдан бөлек мал ұрлығының тағы үш жайтына қатысы бары анықталды. Онда 40 бас қой мен 1 бас сиыр ұрлап, жәбірленушілерге жалпы 3 000 000 теңгеге жуық шығын келтірген. Күдіктілер малдарды көбіне қорадан ұрлап отырған.
Белгілі болғандай, күдіктілер жәбірленушілердің үйіне кезек-кезек ұрлыққа түсіп, қолды еткен малдарын бірінің басқаруындағы жеңіл автокөлікке салып алып кеткен. Ұрланған үй жануарларын ет сататын дүкендерге алып барып, өткізген. Ал ақшасын бөлісіп, өз қажеттеріне жаратқан.
Өз кезегінде Түркістан облысының полицейлері мал иелеріне қырағылық танытуға және әсіресе түнгі уақытта мүліктің сақталуына шаралар қолдануға кеңес береді.
