Қазіргі таңда «Алаяқтық» бойынша түскен шағымдар азаяр емес. Бұл-қоғамның басты дерті іспетті. Ал қоғамда орын алып жатқан түрлі қылмыстар тәртіп сақшыларының әрдайым назарында.
Нақтырақ айта кетсек, Кентау ҚПБ-ға 2 әйел арызданды. Олардың айтуынша, таныс әйел әбден сенімге кіріп, мемлекеттен қайтарымсыз жәрдемақы әперемін деп сендірген. Соның нәтижесінде жәбірленушінің әрқайсысынан 250 000 теңге көлемінде ақша алған. Жалпы шығын 500 000 теңгені құрайды. Аталған дерек ҚР ҚК-нің 190-бабы «Алаяқтық» бойынша тіркеліп, тергеп-тергеу амалдары жүргізілді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Кентау қаласының полицейлері осы жайтты ашу мақсатында, куәлардан жауап алып, қажетті шараларды атқарды. Нәтижесінде күдіктінің жеке-басы анықталды. Ол жұмыссыз жүрген жергілікті тұрғын болып шықты.
Түркістан облысының полицейлері күмән тудыратын кез-келген адамның ұсынысын қабыл алмауларыңызды ескертеді. Оңай олжа тапқысы келетіндердің құрбаны болып кетпеңіздер. Сақтықта қорлық жоқ!
