Естеріңізге сала кетейік, ағымдағы жылдың 10-наурызынан бастап Түркістан облысының аумағында көші-қон қызметінің қызметкерлері «Мигрант» жедел-профилактикалық іс-шарасын өткізуде. Оның негізгі мақсаты көші-қон заңнамасының сақталуын бақылауды қамтамасыз ету және облыс аумағында заңсыз жүрген адамдарды анықтау, сондай-ақ заңсыз көші-қон арналарының жолын кесу болып табылады.
«Мигрант» жедел-профилактикалық іс-шарасы барысында, полицейлер көрсетілген кезеңде көші-қон заңнамасын бұзған 962 адамды анықтады, олардың барлығы әкімшілік жауапкершілікке тартылды. Соның ішінде 677-сі шетелдік болса, 285-і Қазақстан Республикасының азаматтары.
Сондай-ақ, қабылдау-тарату орнына 6 құқық бұзушы орналастырылды, сот шешімімен 65 шетелдік азамат пен 18 адам елден шығарылды, ҚР-да болу мерзімі қысқартылды.
Сонымен қатар, полиция қызметкерлері шетелдіктерге тұрғын үйді заңсыз берудің 238 дерегі мен шетелдік жұмыс күшін заңсыз пайдаланған ҚР-ның 47 азаматын анықтады. Тәртіп бұзушылар ҚР ӘҚБтК-нің 518-бабы «Шетелдіктер мен азаматтығы жоқ адамдарды қабылдайтын жеке немесе заңды тұлғалардың Халықтың көші-қоны саласындағы Қазақстан Республикасының заңнамасын бұзуы» және ӘҚБтК-нің 519-бабы «Шетелдік жұмыс күшін және еңбекші көшіп келушілерді Қазақстан Республикасының заңнамасын бұза отырып тарту» бойынша әкімшілік жауапкершілікке тартылды — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Өз кезегінде Түркістан облысының полицейлері «Мигрант» іс-шарасы аясында құқық бұзушылықтарды анықтап қана қоймай, шетелдік азаматтармен, жұмыс берушілерге профилактикалық түсіндіру жұмыстарын жүргізеді, көші-қон саласындағы заңнаманың сақталмағандығы туралы ескертеді.
