Мақтаарал ауданы ПБ-ға мал ұрысының құрбаны болған тұрғыннан арыз түскен. Оның айтуынша күндізгі уақытта егістік алқапта жайылып жүрген ірі қара малдарын белгісіз біреу жымқырып кеткенін көрсеткен. Жәбірленуші ер адамға келтірілген жалпы шығын көлемі 2 миллион теңгеден астам. Полиция қызметкерлері аталған жайтты ҚР ҚК-нің 188-1-бабы «Мал ұрлығы» қылмыстық құқық бұзушылығы бойынша тіркеді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Орын алған қылмысты ашып, күдіктіні ұстау мақсатында мақтааралдық қырағы полицейлерден жедел-тергеу тобы құрылды. Полицейлер куәлардан жауап алып, жақын аумақтарды тыңғылықты қарап шықты. Мал базарлар мен мал тасымалдайтын автокөліктерді мұқият тексерді. Жан-жақты жүргізілген жедел-іздестіру іс-шараларының нәтижесінде күдіктінің жеке-басы анықталды. Ол жергілікті тұрғын болып шықты. Тәртіп сақшылары анықталған күдіктіні бірден ПБ-ға жеткізді. Қазіргі таңда аталған жайт бойынша күдікті қамауға алынып, тергеу амалдары жүргізілуде.
Белгілі болғандай, күдікті ер азамат жүк көлігі бар өзінің танысын алдап шақырып, аталған үй жануарларын ұрлап, оқиға орнынан бой тасалаған. Осылайша қолды болған жылқыларды Сайрам ауданына алып барып сатып, ақшасын өз қажеттілігіне жұмсаған. Сонымен қатар полиция қызметкерлері күдіктінің тағы бір мал ұрлығына қатысы бар екенін анықтады. Онда да жергілікті тұрғынның 1 бас айғырын ұрлап, 900 000 теңге шығын келтіргені белгілі болды.
Түркістан облысының полицейлері ауыл тұрғындарына қырағы болып, малдарын қараусыз қалдырмау қажеттігін ескертеді. Шаруашылық аулалар мен қора-жайларды сенімді қоршаумен нығайтып, құлыптар мен жарық орнату қажет. Сондай-ақ үй малына ен-таңба салдырып, бақташы жалдау керек. Егер, сіз, мал ұрлығының құрбаны немесе куәсі болсаңыз, тез арада «102» телефонына хабарласыңыз.
