Түркістан қалалық Полиция басқармасына жергілікті тұрғын «Stells» маркалы велосипедінің ұрланғаны жөнінде арызданған. Жәбірленуші тұрғынның айтуынша, оның дәмхана жанына қойып кеткен 60 мың теңгелік велосипедін белгісіз біреу жымқырып кеткен. Оқиға орнына бірден учаскелік инспекторлар келіп, велосипед ұрлаған ұрыны іздеуге кірісті. Тәртіп сақшылары аулаларды аралап, куәлардан жауап алып, дүкен мен көшеде орнатылған бейнебақылау камераларын тексерді. Полицейлер жедел-іздестіру шаралары нәтижесінде күдіктіні 1 тәулік ішінде ұстады— деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Белгілі болғандай күдікті айналасындағы ешкімнің жоғын пайдаланып өз арам ойын жүзеге асырып ізін суытқан. Бүгінде айғақты зат ретінде ұрланған велосипед алынып, заңды иесіне қайтарылды. Қазіргі уақытта аталған жайт ҚР ҚК-нің 188-бабы «Ұрлық» бойынша тіркеліп, сотқа дейінгі тергеу амалдары жүргізілуде. Ұсталған ер азаматтың айтуынша ол алкогольдік ішімдік алуға ақшасы болмаған соң велосипедті жымқырып ақшаға айырбастамақшы болған.
Түркістан облысының полицейлері велосипедті қараусыз қалдырмауды ескертеді. Мұндай ұрлық түрінен қорғанудың жалғыз кепілдендірілген әдісі — велосипедті қараусыз қалдырмау. және басқа да амалдар, ұрлыққа оқталған тұлғаның жолында уақытша кедергі, сондықтан егер велосипедті қалдыруға тура келсе, онда міндетті түрде ешкім бұзып әкете алмайтындай ұрлыққа қарсы трос қолдануды әдетке айналдырыңыз. Велосипедіңізді камерасы бар орынға қойыңыз.
