ҚР ІІМ нұсқауына сәйкес Түркістан облысының аумағында атыс қаруын пайдалана отырып, қылмыстың алдын алуға және жолын кесуге, заңсыз сақталған тіркелмеген қаруды анықтауға, заңсыз қару айналымымен айналысатын адамдар мен қылмыстық топтарды ұстауға және қару иелерінің оны сақталуын тексеруге бағытталған «Қару» жедел-профилактикалық іс-шарасы өткізілуде.
Бес тәулік ішінде полиция қызметкерлері заңсыз айналымнан 2 снаряд, 8 атыс қаруы, оның ішінде 2 шолақ, 5 тегіс ұңғылы қару және 1 травматикалық тапанша тәркіледі — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Мысалы, Келес ауданында учаскелік инспекторлар жергілікті тұрғынның ауласынан снарядқа ұқсас затты тапты. Белгілі болғандай, ауыл тұрғыны үйге көрші ауданнан металл алып келген, ал сұрыптау кезінде екі снарядты байқап, полицейлерді шақырған.
Аталған жайт Келес АПБ-ға тіркелді. Оқиға орнына жедел-тергеу тобы мен әскери бөлімнің қызметкерлері жетті. Полиция тәркіленген қауіпті құрылғыны жою үшін саперларға тапсырды.
Жетісай ауданында профилактикалық жұмыстар барысында Жетісай АПБ қызметкерлері жас жігіттен тіркелмеген «ОСА» маркалы травматикалық тапаншаны 4 патронымен тәркіледі. Аталған дерек ҚР ҚК 287-бабы «Қаруды, оқ-дәрілерді, жарылғыш заттар мен жарылғыш құрылғыларды заңсыз сатып алу, беру, өткізу, сақтау, тасымалдау немесе алып жүру»бойынша СДТБТ-ға тіркелді. Бүгінде полицейлер сотқа дейінгі тергеу амалдарын жүргізіп, барлық мән-жайды анықтауда.
Сонымен қатар, «Қару» жедел-профилактикалық іс-шарасы барысында тәртіп сақшылары 700-ден астам қару иелерін тексеріп, 69 әкімшілік құқық бұзушылықты анықтады. Оның ішінде, ӘҚБтК-нің 482-бабы «Жеке және заңды тұлғалардың қаруды заңсыз иеленуі, беруі, өткізуі, сақтауы, алып жүруі, тасымалдауы» бойынша 5 әкімшілік хаттама толтырылды. ҚР ӘҚБтК-нің 484-бабы «Азаматтық, қызметтік, марапаттық, коллекциялық қаруды, оның патрондарын сатып алу, беру, есепке алу, сақтау, пайдалану, тасымалдау, Қазақстан Республикасының аумағына әкелу, Қазақстан Республикасының аумағынан әкету және Қазақстан Республикасының аумағы арқылы транзитпен өткізу тәртібін бұзу «- 27 және ҚР ӘҚБтК-нің 486-бабы бойынша «Азаматтық, қызметтік, коллекциялық қаруды тіркеу (қайта тіркеу) не оны есепке қою тәртібін бұзу» 42 тәртіп бұзушыны жауапқа тартты.
Өз кезегінде Түркістан облысының полицейлері азаматтарға атыс қаруы мен оқ-дәрілерді заңсыз сақтау мен тасымалдағаны үшін жауапкершілік қарастырылғанын ескертеді. Сондай-ақ тәртіп сақшылары заңсыз сақталған қаруды немесе оқ-дәрілерді өз еркімен тапсырған адамдар қылмыстық және әкімшілік жауапкершіліктен босатылатынын еске салады.
