Қазығұрт аудандық полиция бөліміне аудандағы шаруа қожалықтың бірінің иесінен арыз келіп түсті. Жәбірленуші тараптың айтуынша, белгісіз біреулер шаруа қожалықтың қоршалмаған жер учаскесінде тұрған темірден жасалған 3 тонналық тіркемелі темір цистернасын жымқырып кеткен. Келтірілген шығын көлемі 500 000 теңгені құрады.Аталған жайт ҚР ҚК-нің 188-бабы «Ұрлық» бойынша тіркеуге алынды.
Орын алған ұрлықты тез арада ашып, күдіктіні анықтау мақсатында тәжірибелі тәртіп сақшыларынан жедел-тергеу тобы құрылды. Жедел уәкілдер мен учаскелік полиция инспекторлары оқиға орнына жақын аймақтарды мұқият қарап шықты. Сұрастыру жұмыстарын жүргізді. Барлық бейнебақылау камералары тексерілді. Нәтижесінде жинақталған ақпарат көздері арқылы күдікті 1 тәулік ішінде анықталды. Ол осы қожалықта жұмыс жасап кеткен бұрынғы жұмысшы болып шықты.
Анықталғандай, осы жерде жұмыс жасаған күдікті ер адам, ақша керек болып, арам ойы туындаған. Содан су тасуға арналған цистернаны сатып, пайда табамын деген ниетін жүзеге асырған. Арнайы трактор көлігін жалдап әкеліп, қараусыз тұрған цистернаны алып кеткен. Оны Сарыағаш ауданының тұрғынына 150 000 теңгеге сатып жіберген. Қазіргі таңда «Ұрлық» бабымен сотқа дейінгі тергеу амалдары жүгізілуде. Ал ұрланған цистерна айғақты зат ретінде алынып, заңды иесіне қайтарылды — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Өз кезегінде Түркістан облысының полицейлері азаматтарға бағалы заттарына, мал-мүлкіне абай болуды ескертеді. Қарапайым ғана қауіпсіздік шараларын сақтай отырып, ұрылардың жолын кесуге болады. Яғни тұрғын-үйіңізбен, басқа да кәсіпкерлік ғимараттарыңыздың толық қоршалғанын қадағалаңыз. Жарықтандырып, мүмкіндігінше бейнебақылау камераларын орнатыңыз.
