Түркістан қалалық ПБ-ға жергілікті әйел тұрғын танысына алданып, берген ақшасын ала алмай жүргенін айтқан. Яғни арызында 2021 жылдың желтоқсан айында танысы Ресей Федерациясына ұлын жұмысқа орналастырып беремін деп, 160 000 теңге ақшасын алып, әлі күнге дейін қайтармағанын көрсеткен. Осылайша алаяққа алданғанын түсінген тұрғын полиция қызметкерлерінен көмек сұраған. Тәртіп сақшылары аталған жайтты ҚР ҚК-нің 190-бабы, яғни «Алаяқтық» қылмыстық құқық бұзушылығы бойынша СДТБТ-ға тіркеді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Шұғыл-іздестіру іс-шараларын жүргізген түркістандық қырағы тәртіп сақшылары осы жайтқа қатысы бар күдіктіні тұрғылықты мекенжайынан ұстады. Қазіргі таңда аталған жайтқа байланысты тергеу амалдары жүргізілуде.
Белгілі болғандай күдікті ер адам оңай жолмен ақша табуды көздеп, танысынан алаяқтық жолмен ақша алған. Содан соң оны өзінің қажеттілігіне жұмсап, бірнеше ай бойы алдап келген.
Өз кезегінде облыс полицейлері азаматтарға сақ болуды, жақын таныс емес азаматтарға сенбеуге кеңес береді. Егер, сіз, алаяқтың құрбаны немесе куәсі болсаңыз, тез арада полицияның «102» телефонына хабарласыңыз.
