Цатишаев Мұса Абдуллағапұлы ішкі істер саласында абыройлы қызмет етіп, бүгінде бейнетінің зейнетін көріп отырған ардагер аға. Ол 1965 жылы 14 ақпанда дүниеге келген. Мұса аға ішкі істер органдарында өзінің бүкіл еңбек жолын жасап, жедел уәкілдік қызметті жіті меңгерген. Ол 14 жыл бойы ішкі істер органдарындағы басшылық қызметін адал атқарып, өз қолтаңбасын қалдырған майталман маман. Мамандығына шын берілген қызметкер көптеген шәкірттерді тәрбиелеп, жол көрсетіп, үлгілі тәлімгер бола білді. Оның тәлімін алған қызметкерлердің ішінде біразы үлгілі еңбек етуде. Өз заманында талай қандықол қылмыскерлерді құрықтап, ашылуы кідірген қылмыстарды дер кезінде аша білді. Солардың біріне тоқталар болсақ, бұл оқиға осыдан бірнеше жыл бұрын орын алған болатын.
«Қарақшылық шабуылмен айналысқан қылмыстық топты ұйымдастырушысымен бірге ұстаған едік. Топтың Руп есімді басшысы бұрын-соңды бірнеше рет сотты болған, Қостанайдың тумасы. Түрмеден шыққан соң, ескі әдетіне басып қайтадан қылмысқа барады. Ол өзінің сыбайластарымен бірге қарақшылық іс-әрекетін түнгі уақытта жүзеге асырған болатын. Қарақшылар тобы беттеріне бетперде киіп алып, жәбірленушілердің үйіне баса көктеп кіріп, алтын бұйымдары мен ақшалары қайда тұрғанын айтпасаң, үтікпен күйдіремін деп қинап, бағалы заттарын алып кеткен. Жауапкершілікті іс сол кезде басшылық тарапынан бізге тапсырылды. Олардың ізіне түсіп, анықтап, жасаған қылмыстарын тайға таңба басқандай дәлелдеп шықтық. Айғақты заттарды да алдық. Сондай-ақ бұл қылмыстық топта басшысынан бөлек 11 адам болған, оларды да көп ұзамай қолға түсірдік. Көптомды істің көптігі сонша сотта том-том істерді залға қап-қабымен алып шыққаны әлі есімде. Куә болған жәбірленушілер де Қазақстанның түкпір-түкпірінен келді. Әділдік жеңіп, қылмыскерлер темір торға тоғытылды…» деп еске алады Мұса Цатишаев.
Мамандығын мақтан тұтқан Мұса Цатишаев өз ісінің нағыз шебері екендігін осындай қылмыс қатарларын ашу арқылы дәлелдеген. Алайда қызметке берілген маман, өзінің отбасылық өмірін кейінге шегеріп жүріп, зейнет уақытының келгендігін байқамай қалады. Кеш те болса, өзінің өмірлік жарын дәл тауып, оған ниетін білдіріп бас қосады. Ішкі істер саласының үлгілі қызметкерінің жанын бірден түсінген және өзі секілді ішкі істер саласының маманы болған Серікбаева Жанар Сазанқызымен бас қосып, бүгінде бақытты ғұмыр кешуде.
Еңбектерінің жемісін көріп отырған қос жұптың Арзу атты қызы бар. Зейнет шағында әке атанған Мұса аға бар махаббатын өз отбасына арнап, өмірін мәнді өткізуге бет бұрған.
Полиция подполковнигі шенімен ішкі істер органдарының зейнеткері атанған Мұса ағаның жастарға үлгі боларлық өмір жолы міне осындай.
Гүлнар Әбдірахманқызы.
Түркістан облысы полиция департаменті
