Естеріңізде болса, 2020 жылдың ақпан айында Жетісай ауданы Күрішті ауылының тұрғыны «99 жасқа келген Күлай Сүгірбаеваның жеке куәлігін осы таңға дейін алмағаны» бойынша мәселе көтерілген еді-деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Сол кезде анықталғандай Күлай әже өзінің барлық құжаттарын жоғалтып алған, соның салдарынан ұл-қыздары да құжатсыз жүрген. Ал, полицейлер болса, аталған қарт тұрғын жеке басын куәландыратын құжат алу жөнінде бұдан алдын Жетісай ауданы полиция бөліміне өтініш білдірмегені және көші-қон қызметі бөлімшесіне жүгінбегенін айтқан болатын.
Осыған байланысты құжатсыз қарт тұрғынға тәртіп сақшылары Қазақстан Республикасы ІІМ-нің бұйрығына сәйкес ҚР азаматтығына құжаттандыру үшін бірінші кезекте полиция бөліміне барып өтінішхат жазуы тиіс екендігі түсіндірілген. Оған қоса ҚР азаматтығына тиесілігін анықтау үшін өтінішхатпен бірге туу туралы куәлік, еңбек кітапшасы, орта немесе толық орта емес білімі туралы аттестат, диплом немесе шаруашылық бойынша кітаптан үзінді көшірмелерін тапсыруы қажет. Алайда, тексеру барысында жоғарыда көрсетілген құжаттардың ешқайсысы азаматша К.Сүгірбаевада жоқ екендігі белгілі болды.
Осыған қарамастан Жетісай АПБ Көші-қон қызметінің қызметкерлері ҚР ІІМ-нің талаптарын егжей-тегжейлі түсіндіре отырып, тұрғынға құжаттарын жинақтауға көмектесті. 2-3 ай аралығында сот шешімімен туу туралы куәлігі қалпына келтіріліп дайын болды. Одан кейін жедел әрекет еткен полицейлер азаматша К.Сүгірбаеваның ҚР азаматтығын растау туралы өтінішхатын қабылдады. 20 күннен кейін тұрғынның жеке куәлігі даяр болды. Осылайша бір ғасыр жасаған әжейге жеке куәлігін әперу үшін тәртіп сақшылары барлық қажетті шараларды жүргізіп, көмек қолын созды. Дайын құжатты ақжаулықты ананың шаңырағына барып, арнайы табыстады.
Өз кезегінде Жетісайлық 100 жастағы ана құжаттарын жасап берген полицейлерге алғысын білдірді. Жұмыстарына табыс тілеп, ақ батасын берді.
ТО ПД-нің баспасөз қызметі
