Түркістан ҚПБ-ға жергілікті тұрғын арызданып келген. Онда жәбірленуші азамат кешкі сағат 17:05 шамасында Түркістан қаласындағы автобекеттердің біріне өзінің ауылына қайту мақсатында барған. Сол сәтте белгісіз азамат келіп, мойнындағы күміс алқасын күш көрсету арқылы тартып алған. Ал қолындағы ұялы телефоны жерге түсіп, сынып қалған. Жәбірленуші азаматқа жалпы 40 000 теңгеге жуық шығын келтірген. Полиция қызметкерлері аталған жайтты ҚР ҚК-нің 191-бабы «Тонау» бойынша СДТТБТ-ға тіркеді.
Орын алған қылмысты ашу және күдіктіні ұстау мақсатында Түркістан ҚПБ-ның тәжірибелі қызметкерлерінен арнайы жедел-тергеу тобы құрылды. Полицейлер оқиға орнын тыңғылықты тексеріп, куәгерлерден сұрастырып, жақын аралықтағы бейнебақылау камераларын тексеріп шықты. Нәтижесінде полицейлер күдікті ер азаматтың жеке басын анықтап, өз үйінен ұстады. Оқиғаның мән-жайын толық тексеру мақсатында күдіктіні ПБ-ға жеткізді. Ал тартып алынған зат тәркіленіп алынып, заңды иесіне қайтарылды. Қазіргі таңда аталған жайтқа байланысты тергеу амалдары жүргізілуде. Күдіктінің бас шарасы қолхатта — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Белгілі болғандай күдікті ер азамат жәбірленушінің мойнындағы күміс алқасына көзі түскен. Оны оңай жолмен иеленіп алу мақсатында күш көрсетіп, алқасын тартып алған. Содан соң оны өзінің досына сыйлық ретінде берген.
Түркістан облысының полицейлері азаматтарға өз бағалы заттарыңызға сақ болыңыздар деп ескертеді. Тонау, ұрлық, қарақшылық жайттары орын ала қалса, тез арада полицияның «102» телефонына хабар беріңіздер. Уақытында берілген ақпарат қылмыстың «ізін суытпай ашуға» толық мүмкіндік береді.
ТО ПД-нің баспасөз қызметі
