65 шетел азаматы әкімшілік-жауапкершілікке тартылды

Түркістан қаласында «Мигрант» жедел-профилактикалық іс-шарасы өткізуде. Басты мақсат – Қазақстан Республикасына келу, болу және Қазақстан Республикасынан кету Ережелерінің сақталуын қадағалау, Түркістан облысы аумағында шетелдіктерді тиісті құқықтық тәртіппен қамтамасыз ету, заңсыз келген және осында тұрып жатқан шетел азаматтарын және заңсыз көші-қон ұйымдастырушыларды анықтау.
Мамыр айының 7 мен 16 аралығында өтіп жатқан шара барысында Түркістан қаласының аумағында заңсыз жүрген 65 шетел азаматтары әкімшілік-жауапкершілікке тартылды. Оның ішінде ҚР ӘҚБтҚ-нің 517 бабы «Шетелдiктiң немесе азаматтығы жоқ адамның Қазақстан Республикасының халықтық көші-қон саласындағы заңнамасын бұзуы» бойынша 24 шетелдікке әкімшілік хаттама толтырылды. Өзге елден келген 4 азамат Қазақстан Республикасы аумағынан аластатылды.
Шетелдіктерді заңсыз жұмысқа қабылдаған тараптардан 10 азамат әкімшілік-жауапкершілікке тартылды. Оның ішінде 2 кәсіпкер заңсыз жұмыс күшін тартқаны үшін айыппұл төлемек. Ал, Өзбекстан Республикасының 39 азаматына заңды шешім қадылдау үшін әкімшілік істер Түркістан қалалық мамандандырылған әкімшілік сотына жолданды — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Өз кезегінде, Түркістан облысының полиция қызметкерлері аталған іс-шарада тек құқықбұзушылықты анықтап қоймай, шетел азаматтары және жұмыс берушілермен профилактикалық түсіндіру жұмыстарын жүргізеді, көші-қон қызметі туралы заңдылықтарды сақтау бойынша ескертеді.