Сайрам аудандық Полиция басқармасына жергілікті тұрғын арызданды. Ер адамның айтуынша, оның өзіне тиесілі «сыра аппаратын» танысы ай сайын келіскен ақшаны беріп тұрамын деп, жалға алған. Алайда арадан айға жуық уақыт өткенде жәбірленуші, өзге біреулерден сеніп тапсырылған аппараты сатылып кеткенін естіген. Содан тікелей жалға алушыдан сұрағанымен нақты жауап ала алмай, біраз уақыт өткізген. Осыған байланысты полицейлерге арызданып, істің мән-жайын анықтап беруін сұраған. Жәбірленушіге келтірілген шығын 240 000 теңгені құрады.
Хабарлама түскен мезетте сайрамдық тәжірибелі тәртіп сақшылары орын алған қылмысты ашып, кінәліні анықтауға қатысты шараларға кірісті. Куәгерлерден жауап алды, мұқият тексеру жұмыстарын атқарды. Полицейлермен жан-жақты ұйымдастырылған қызмет нәтижесінде күдікті ер адам 1 тәулік ішінде ұсталып, АПБ-ға жеткізілді. Өз кінәсін мойындаған күдікті жергілікті тұрғын болып шықты.
Белгілі болғандай, күдікті өзіне сеніп тапсырылған бөтеннің мүлкін ысырап еткен. Яғни «сыра аппаратын» талан-таражға салып, ауылдасына арзан бағаға сатып жіберген. Десекте тәртіп сақшыларының тындырымды тірлігінің арқасында аппарат табылып, айғақты зат ретінде алынды. Қазіргі таңда полиция қызметкерлері аталған жайтты ҚР ҚК-нің 189-бабы «Сенiп тапсырылған бөтен мүлiктi иемденiп алу немесе талан-таражға салу» бойынша СДТБТ-ға тіркеді. Сотқа дейінгі тергеу амалдары жүргізілуде. Күдіктінің бас шарасы «қолхатта» — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Өз кезегінде, Түркістан облысының полицейлері тұрғындарға бағалы заттарына, мал-мүлкіне қырағы болуды ұсынады. Сонымен қатар жақсы таныс емес азаматтарға өзіңізге тиесілі заттарды сеніп тапсырмауға кеңес береді. Егер де, сіз, қандай да бір қылмыстың құрбаны немесе куәсі болсаңыз, тез арада полицияның «102» телефонына хабарласыңыз.
ТО ПД-ның баспасөз қызметі
