Ішкі істер органдарының кәсіби мерекесі «Қазақстан Полициясы күні» қарсаңында Түркістан облысы Полиция департаментінде тағылымданушылардың ант қабылдау рәсімі болып өтті.
Аталмыш шараға ТО ПД басшы құрамы мен жас полицейлер қатысты. Салтанатты шарада Алматы академиясының оқу курсын аяқтаған – 60, оның ішінде 29- басшы құрам мен кіші басшы құрам, яғни 31-тағылымданушы департамент алаңында сап түзеді. Салтанатты шара карантин талаптары сақтала отырып ұйымдастырылды.
Бабаларымыздан аманат ретінде мұра боп қалған Қазақстанның ұлан-байтақ жері мен елін ақтық демі қалғанша қорғауға салтанатты түрде ант берген жастарды ТО ПД бастығының орынбасары полиция полковнигі Бағлан Халықов қабылдап, жылы лебізін жеткізді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Ол жас полицейлерге: «Бүгіннен бастап полиция қатарына қосылдыңдар. Енді сендер тұрғындардың тыныштығы мен қауіпсіздігі жолында қызмет етіп, анттарыңа адал болуларың керек! Жас маман ретінде сендерді жұмысқа жаңаша леп әкеліп, өнімді еңбек етеді деп сенеміз! Сондықтан сенімді ақтап, жауапкершілікті жіті сезініңдер!», — деді.
Жалпы елін қорғайтын азаматтардың ант қабылдауы — Отанына, халқына ақтық демі шыққанша адал болуды, ел басына сын сағат түссе де мойымай көтеруді, қажет болса жан қию дегенді ұғындырады.
Ендеше ант қабылдап, еліне адал рухы мен патриот сезімі бар жастарымыздың саны арта берсін! Еліміз дін аман, халқымыз тыныш, әлемде бейбіт өмір болсын!
ТО ПД-нің баспасөз қызметі
