Қауіпсіз жол жедел-профилактикалық іс-шарасы барысында Түркістан қалалық Полиция басқармасы ЖПҚ Патрульдік полиция ротасының қызметкерлері орталық көшелерде рейдтік-профилактикалық шаралар ұйымдастырды. Яғни, тәртіп сақшылары түрлі жол апаттарының алдын алу, болдырмау мақсатында Әмір Темір мен Б.Саттарханов көшелерінің қиылысында жол қозғалысы ережесінің сақталуын қамтамасыз етті.
Іс-шара кезінде көбіне жүргізушілер, қауіпсіздік белдігін тақпау, көлік басқарып келе жатқанда ұялы телефонмен сөйлесу секілді құқық бұзушылықтарды жасады. Сондықтан оларға тиісті заңды шара көрілу үшін әкімшілік хаттамалар толтырылды. Оның ішінде мысалы, патрульдік полиция қызметкерлерімен қауіпсіздік белдігін тақпағаны үшін тоқтатылған «Mercedes Gelendvagen» автокөлігінің құжаттарын тексеру кезінде, жүргізуші куәлігінің уақыты өтіп кеткені анықталды. Осыған орай ҚР ӘҚБтК-нің 593-бабы «Жол жүру ережелерінде көзделген жолаушылар мен жүктерді тасымалдау, қауіпсіздік белдіктерін немесе мотошлемдерді пайдалану жөніндегі талаптарды сақтамау» мен 612-бабы «Құжатсыз және басқару құқығы жоқ адамның көлік құралын басқаруы» бойынша екі бірдей әкімшілік хаттама толтырылып, көлік айыптұраққа қойылды.
Осы тұста айта кетер жайт, полиция қызметкерлері жол қозғалысы ережесін бұзушыларды анықтап, жүргізушілерді әкімшілік жауапкершілікке тартып қана қоймайды. Сондай-ақ барынша түсіндіру жұмыстарын жүргізуде. Жалпы «Қауіпсіз жол» жедел-профилактикалық іс-шарасы басталғалы бері Түркістан ҚПБ полицейлерімен жол қозғалысы ережесін бұзған 2668 жайт анықталып, оларға байланысты әкімшілік хаттама толтырылған — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Өз кезегінде Түркістан облысының полицейлері, жүргізушілерге жол қозғалысы ережелерін қатаң сақтауға шақырады. Ең бастысы жол қауіпсіздігі ережелерін бұзудың соңы, орны толмас өкінішке әкелуі мүмкін екенін естен шығармаңыз! Жолда абай болыңыз!
ТО ПД-ның баспасөз қызметі
