ҚР ІІМ бұйрығына сәйкес 2021 жылдың 20 сәуірінен бастап республика көлемінде «Заңсыз сақталған атыс қаруын, оқ-дәріні және жарылғыш заттарды азаматтардан сатып алу» акциясы өткізілуде. Осы бағытта Түркістан облысында тәртіп сақшыларымен қарқынды жұмыстар атқарылуда. Көпшілікке өз еркімен тіркелмеген қаруларды өткізген жағдайда сыйақы алуға болатындығы түсіндірілуде. Осы тұста бірнеше тұрғындар қаруларын табыстап, акцияға белсенді қатысуда.
Мәселен, Ордабасы аудандық полиция бөліміне 8 тұрғын өздерінің аталарынан қалған 9 қаруды өткізді. Қазіргі уақытта мылтықтар сот-баллистикалық сараптамасына жіберілді. Нәтижесінде азаматтарға ақшалай қаражат төлеу туралы шешім қабылданатын болады — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Айта кететін жайт, қару-жарақ заттарын өз еркімен тапсырғаны үшін, мемлекет қарудың әрқайсысына тиісті төлемін жасайды. Ал сыйақы төлеу қару-жарақ заттарын тапсырған азаматтар ұсынған шоттарға аудару жолымен жүзеге асырылады. Тіркелмеген атыс қаруын, оқ-дәрілер мен жарылғыш заттарды өз еркімен тапсырған азаматтар қылмыстық және әкімшілік жауапкершіліктен босатылады.
Сондықтан тұрғындар заңсыз сақтап жүрген ата, әкеңізден қалған, тауып алған тіркелмеген қаруларыңыз болса, өз мерзімінде тапсырыңыздар.
ТО ПД-ның баспасөз қызметі
