Өздеріңізге белгілі мерейлі мереке қарсаңында Түркістан облысының полицейлері игі істер атқарып, кейінгі жастарға үлгі көрсетуде. Тәрбиелік мәні бар істерді өздерінің дәстүрлі міндеттеріне айналдырған десек артық айтқандық емес. Атап айтқанда, Ордабасы АПБ қызметкерлері өмірден озған Ұлы Отан соғысы ардагерінің отын өшірмей, артында қалған ұрпағын тәрбиелеп, өсіріп отырған аяулы жары Күлайша Құрымбекті құттықтап қайтты. Сонымен қатар полицейдің отбасына Ордабасы АПБ бастығы полиция подполковнигі Ғалымжан Қуашбаевтың ұйымдастыруымен, полиция подполковнигі Берік Аманбаев бастаған топпен бірге мерекелік сыйлықтар тарту етілді. Сондай-ақ тыл еңбеккері Төленбек Юсупов атамыздың үйіне де арнайы ат басын бұрды. Мерекесімен құттықтап, сый-сияпаттарын беруді де ұмытпады. Өз кезегінде әрбір мерекеде ұмытпай, елеп-ескеріп, құттықтап келіп тұратын полицейлерге отбасы мүшелері алғыстарын жеткізді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Осындай шара Қазығұрт ауданында да жалғасты. Қазығұрт АПБ бастығы полиция подполковнигі Ерлан Тасполатов және Қазығұрт АПБ бастығының КСЖ орынбасары полиция подполковнигі Бақыт Сейсебаев қайтыс болған ардагердің жары Райхан Қабылбекованы Ұлы Жеңістің 76 жылыдығына орай мерекесімен құттықтап, гүл шоқтарын ұсынды. Сонымен қатар, бағалы сыйлықтарын табыстады. Өз кезегінде ардагер атаның жары үнемі ұмытпай құттықтап келетін, өз балаларындай хал-жағдайын сұрап тұратын тәртіп сақшыларына үлкен рахметін айтты. Жұмыстарына табыс, дендеріне саулық, қызметте биік абырой тіледі. Аналық ақ батасын беріп, алғысын жеткізді.
ТО ПД-нің баспасөз қызметі
