Түркістан облысы ПД Кадр саясаты басқармасының ұйымдастыруымен Департамент бастығының орынбасары полиция полковнигі Бағлан Халықов, департаменттің басқарма басшылары, ІІО мен ҰҰ ардагерлер кеңесінің төрағасы, ІІО ардагері Оспанғазы Жанқожаев, ІІО-ның ардагерлері мен жеке құрам қызметкерлерінің қатысуымен Ұлы Отан соғысында қаза болған батырларымызды еске алу салтанаты болып өтті. Сонымен қатар Түркістан қаласында орналасқан «Жеңіс» саябағындағы Даңқ мемориалында карантиндік режимді қатаң сақтай отырып, 1941-1945 жылдардағы Ұлы Отан соғысындағы Жеңістің 76 жылдығын мерекелеу қарсаңында сұм соғыста ерлік көрсетіп, жеңіс күнін сыйлаған батырлардың құрметіне гүл шоқтарын қойып, бір минут үнсіздікпен еске алды — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
ТО ПД Ардагерлер кеңесінің төрағасы О.Жанқожаев полицейлерді мерекелерімен құттықтап, ізгі тілектерін жеткізді. Осылайша облыс полицейлері қызмет атқарып жүріп, мезгілсіз өмірден озған әріптестерінің есімін еске алды.
«Отан үшін отқа түс, күймейсің» деген осы болар. Ерлік ешқашан ұмытылмайды. Бүгінгі ұрпақтардың алаңсыз өмір сүруі осы ата-бабаларымыздың арқасы.
Осы тұста біз де аспанды бұлт торламасын, еліміз тыныш, бейбітшілігіміз баянды, егемендігіміз тұғырлы болып, бейбітшіліктің символы — көгершін құсы ашық аспанымызда қалықтай берсін,- демекпіз. Мереке құтты болсын!
ТО ПД-ның баспасөз қызметі
