Жасөспірімдер арасындағы қылмысты болдырмау, олардың қауіпсіздігін қамтамасыз ету мақсатында Бәйдібек ауданында ауқымды іс-шара ұйымдастырылды. Бірлік ауылында орналасқан Айнабек Нысанов жалпы орта мектебінде өткізілген келелі кездесуге 10-11 сынып оқушыларының ата-аналары шақыртылған — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Ал, жиынның өткізілуіне ықпал еткен қызметкердің бірі — Бәйдібек АПБ ЖПҚ-нің кәмелетке толмағандардың істері жөніндегі учаскелік полиция инспекторы Нұржан Қозбанов. Оның айтуынша мұндай іс-шаралардың берер пайдасы мол.
«Бүгінгі жиынның басты мақсаты — жасөспірімдер арасында құқық бұзушылықты болдырмау, ата-аналардың, жасөспірімдердің құқықтық сауаттылығын арттыру. Біз күнделікті осы бағытта жан-жақты жұмыс жүргіземіз. Кәмелет жасына толмағандардың түнгі уақытта үлкендерсіз ойын-сауық орындарында болмауы, өзара әлімжеттік жасамауы, жаман әрекеттерге бой алдырмауын жіті қадағалап, рейдтік-профилактикалық жұмыстар жасаймыз. Арасында осылай ата-аналармен байланысып, оларға «Ата-ананың міндеті, баланың құқығы», «Біз және Заң», «Жол қауіпсіздігін сақтау» тақырыптарында ашық сұхбаттар ұйымдастырамыз. Атқарылып жатқан істердің барлығы өскелең ұрпақтың тек жақсы қасиеттерімен биіктен көрінуіне, тәртіпке бағынып, нағыз азамат болуына үлес қосу»,-дейді өз сөзінде полицей Нұржан Қозбанов.
ТО ПД-ның баспасөз қызметі
