Түркістан облысы ПД Есірткі қылмысына қарсы іс-қимыл басқармасының қызметкерлеріне, жергілікті тұрғындардың бірінің есірткі сатумен айналысатыны туралы хабарлама келіп түсті. Аталған жайтты полиция қызметкерлері СДТБТ-ға ҚР ҚК-нің 297-бабы «Есірткі құралдарын, психотроптық заттарды, сол тектестерді өткізу мақсатында заңсыз дайындау, қайта өңдеу, сатып алу, сақтау, тасымалдау, жөнелту немесе өткізу» бойынша тіркеді.
Ақпарат алысымен ТО ПД ЕҚҚІҚБ-мен Сарыағаш АПБ-нің қызметкерлері бірлесе отырып, жедел әрекет етіп, аталмыш тұрғынның жеке басын, мекенжайын анықтап, үйіне тінту жұмыстарын жүргізді. Нәтижесінде оның үйінің жатын, қонақ бөлмелерінен ішінде ақ түсті ұнтағы бар есірткіге ұқсас 19 дана қағазға оралған зат табылады. Одан бөлек жиналған көрпе арасынан пневматикалық тапанша табылып, тәркіленіп алынады.
Күдікке ілінген тұрғынның үйінен алынған есірткінің салмағы сараптама қорытындысымен 300 грамға жуық «кептірілген марихуана» болып шықты. Ал, қару аталған ер адамның атына тіркелмегені белгілі болды. Қазіргі таңда сараптама тағайындалды. Күдікті уақытша ұстау изоляторына қамауға алынды. Сотқа дейінгі тергеу амалдары жүргізілуде — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Өз кезегінде Түркістан облысының полицейлері есірткі қолданып, сатумен айналысу, өсіру, сақтаудың соңы заң алдында қылмыстық жауапқа тартылумен аяқталатынын ескертеді. Сол себепті, «Қылмыстың өтеуі – жаза» екендігін естен шығармайық! Егер де, сіз, осындай қылмыстардың куәгері болсаңыз немесе есірткі құралдарын заңсыз сақтау және өткізу деректері туралы қандай да бір ақпаратты білсеңіз, тез арада полицияға хабарласыңыз.
ТО ПД-ның баспасөз қызметі
