Бүгінде тұрғындар көбіне алаяқтардың арбауына түсіп, оларға өз қолдарымен ақшаларын беріп, соңында бармақтарын тістеп қалуда. Танымайтын, бір рет қана көрген жанның күмәнді ұсынысын қабыл аламыз деп, бар жиған-тергенінен бір сәтте айырылып жатқандары да баршылық. Осындай кезекті алаяқтық қылмысын сайрамдық полицейлер ашты.
Нақтырақ айтсақ, Сайрам АПБ-на жергілікті бірнеше тұрғын арызданып келеді. Әйелдердің айтуынша, олардың сырттай таныстары, мемлекет тарапынан берілетін әлеуметтік көмек алып бере аламын деп, әбден иландырған. Алаяққа сеніп қалған әйелдер, оның сұрағанын береді. Алайда 2 аптадай уақыт өтсе де, ешқандай нәтиже шықпайды. Яғни, алаяқ не көмек ақшаны шығарып бермеген, не тұрғындардың өз ақшаларын қайтармаған. Содан кейін тұрғындар полицейлерден көмек сұрайды.
Аталған жайт АПБ-не 190-бап «Алаяқтық» бойынша тіркеуге алынды. Полицейлер жәбірленушілерді алдап, ақшаларын жымқырып кеткен алаяқты ұстауға қатысты жедел-іздестіру іс-шараларын жүргізді. Соның нәтижесінде күдіктіні тұрғылықты мекенжайынан ұстап, АПБ-не жеткізді. Ол жергілікті тұрғын, жұмыссыз жас қыз болып шықты — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Тергеу барысында анықталғандай, күдікті өзінің ақшадан қиналып жүргенін алға тартып, оңай жолмен ақша табу мақсатында, алаяқтық жасау ойы туындап, арам пиғылын іске асырған. Содан жәбірленушілерден барлығы 500 000-нан астам теңге алған. Күдікті жас қыздың бас шарасы «қолхатта». Бүгінгі күні сотқа дейінгі тергеу амалдары жүргізіліп, жинақталған іс-құжаттары заңды шара көрілу үшін сотқа жолданды.
Түркістан облысының полицейлері азаматтарға ескертеді: ешқашан күмәнді ұсыныстарға сенбеңіз, кез келген адамға ақшаңызды бермеңіз. Алаяқтардың арбауына түсіп қалудан сақтаныңыз. Егер, сіз де, алаяқтық қылмысының құрбаны немесе куәгері болсаңыз, бірден «102» телефоны арқылы полицейлерге хабарласыңыздар.
ТО ПД-ның баспасөз қызметі
