Тұрғындарды алдап, алаяқтық жолмен ақша алған күдікті әйелді ұстады

Сарыағаш АПБ-не бірнеше жергілікті тұрғын алаяқтың құрбаны болғандығы жөнінде арыз түсірген. Жәбірленуші әйелдердің айтуынша, белгісіз біреу мемлекет тарапынан 1 миллион теңге қайтарымсыз несие алып беремін деп сенімдеріне кіріп, алаяқтық жолмен әрқайсысынан 120 000 теңгеден ақшасын заңсыз иемденіп кеткенін көрсеткен. Содан не несиені әпермеген, не ақшаларын қайтармаған. Алаяққа алданғанын білген әйелдер көмек сұрап полицейлерге шағымданады. Тәртіп сақшылары аталған жайтты ҚР ҚК-нің 190-бабы «Алаяқтық» бойынша СДТБТ-ға тіркеп, қылмыстық істі бірден бастап кетті.
Арызданушылардың шағымына сәйкес, орын алған алаяқтық қылмысын ашып, күдіктіні анықтау мақсатында Сарыағаш АПБ-ның қызметкерлері қажетті іс-шараларды жүргізді. Тексеру жұмыстары нәтижесінде, полицейлер осы қылмысқа күдікті ретінде жас әйелді ұстады. Ол жергілікті тұрғын болып шықты — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Тергеу барысында анықталғандай, жұмыссыз әйел оңай жолмен ақша таппақ болған. Қазіргі таңда тергеу амалдары жүргізілуде. Күдіктінің бас шарасы «қолхатта». Полицейлермен ұсталғанның бұдан басқа да жайттарға қатыстылығы анықталуда.
Түркістан облысы полицейлері облыс тұрғындарына кез келген жанға сенбеуді, алаяқтың арбауына түсіп қалмауды ескертеді. Азаматтарға әр түрлі алаяқтардың айла-амалдарына түспеу үшін, қырағы болуды ұсынады. Таныс емес адамдарға мүліктеріңізді, жеке мәліметтеріңізді, банк шоттарының кодтарын және ақшаларыңызды, басқа да құпия ақпаратты бермеңіз. Сақ болыңыз және оңай пайда табуға үміттенбеңіз. Егер, сіз, алаяқтықтың құрбаны немесе куәгері болсаңыз, тез арада полицияға 102 телефоны арқылы хабарласыңыз.
ТО ПД-ның баспасөз қызметі