Келес АПБ КПБ-нің жедел уәкілі полиция аға лейтенанты Мұрат Жанадилов күнделікті қызметін атқару кезінде, Абай ауылындағы ғимараттың бірінде заңсыз ойын болып жатқанын анықтап, тез арада ПБ кезекші бөліміне хабарлама түсіреді. Ақпарат алысымен полицейлер, оқиға орнына жетеді. Соның нәтижесінде жедел-тергеу тобы букмекерлік кеңседен заңсыз ойын бизнесін ұйымдастыру дерегін анықтайды.
Жедел-іздестіру іс-шаралары барысында, ғимараттың бірінші қабатында орналасқан букмекерлік кеңсесінен бірнеше келушілер, сондай-ақ ойын залының операторы шымкенттік жас қыз ұсталды. Айғақты зат ретінде 9 компьютер, 9 дана процессор, 1 дана кассалық аппарат, 1 дана сканер және 2000 теңге ақша тәркіленді. Аталған жайт ҚР ҚК-нің 307-бабымен «Заңсыз ойын бизнесін ұйымдастыру» бойынша тіркелді. Қазіргі уақытта сотқа дейінгі тергеу амалдары жүргізілуде. Сараптама тағайындалды.
Ал, келушілерге ҚР ӘҚБтК-нің 441-бабының 1-бөлігімен «Белгіленбеген орында темекі шегу» әкімшілік хаттама толтырылды. Оған қоса ойын залының операторына ҚР ӘҚБтК-нің 425-бабы «Халықтың санитариялық-эпидемиологиялық саламаттылығы саласындағы заңнама талаптарын, сондай-ақ гигиеналық нормативтердi бұзу» бойынша хаттама толтырылып, заңды шешім қабылдау үшін іс-құжаттары СЭББ-ға жолданды. Оқиғаның мән-жайы анықталуда — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Өз кезегінде Түркістан облысының полицейлері заңсыз құмар ойындарды ұйымдастырғаны үшін қылмыстық жауапкершілік қарастырылғанын ескертеді. Егер де, сіз, осындай қылмыстар туралы ақпарат білсеңіз, тез арада полицияның 102 нөміріне хабарласыңыз.
ТО ПД-ның баспасөз қызметі
