Созақ АПБ-ның кезекші бөліміне жергілікті тұрғын өзінің банк кәртішкесінен жарты миллион теңгеден астам ақшасының жоғалғаны туралы арызданды-деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Аталған жайтты полицейлер ҚР ҚК-нің 188-бабы «Ұрлық» бойынша СДТБТ-ға тіркеді. Осылайша тәртіп сақшылары орын алған жайттың толық мән-жайын анықтауға кірісті. Жедел іздестіру жұмыстары жүргізіліп, куәгерлерден сұрақ жауаптар алынды. Атқарылған шаралардың нәтижесінде небары бір күн ішінде күдікті тұлғаның ізіне түсті.
Яғни тергеп-тексеру барысында белгілі болғандай күдікті әйел мен жәбірленуші әріптес болған. Олар бір-бірінің жеке мәліметтерін жақсы білген. Соны пайдаланған күдікті әйел жәбірленушінің банк кәртішкесін жымқырып, ақшаны оп-оңай шешіп алған. Сондай-ақ ол ақшаның біршамасын өз қажеттілігіне жаратып жіберген.
Ұсталған әйелден айғақты зат ретінде соманың бір бөлігі алынып, заңды иесіне қайтарылды. Бүгінгі таңда күдіктінің бас шарасы қолхатта. Аталған жайт бойынша тергеу амалдары жүргізілуде.
Түркістан облысы полицейлері азаматтарға бағалы заттарыңыз банк кәртішкілеріңізге, әмияндарыңызға сақ болыңыздар деп ескертеді. Қалта ұрыларының көзіне түспес үшін бағалы заттарыңызды көрсетпей, аузы жабық сөмке ішіне салып қойыңыздар деп кеңес береді.
ТО ПД-нің баспасөз қызметі
