Түркістан облысы ПД Есірткі қылмысына қарсы іс-қимыл басқармасының полицейлері арнайы жедел-іздестіру шаралары аясында, күдікті ретінде Сарыағаш ауданының тұрғынын ұстады.
Оның үйіне тінту жүргізу кезінде 3 дана полиэтилен пакетке салынған есірткіге ұқсас зат табылып, тәркіленіп алынды. Полицейлер күдікке ілінген ер адамнан жауап алу барысында, тың ақпаратты анықтады. Яғни бұл азамат есірткіні Келес ауданындағы танысынан алғанын жеткізді. Аталмыш ақпарат негізінде жедел уәкілдер бірден әрекет етті. Полицейлер келестік тұрғынның үйіне кезек күттірмейтін тінту жұмыстарын жүргізді.
Нәтижесінде ер адамның есірткіге ұқсас заты бар 5 полиэтилен пакет пен 1 қапты тауып, айғақты зат ретінде тәркілеп алды. Тәртіп сақшыларының қырағылығы мен кәсіби шеберлігі арқасында табылған затқа сараптама тағайындалды. Нәтижесінде ол 10 келіге жуық марихуана болып шықты. Аталған жайт ҚР ҚК-нің 296-бабы «Есірткі құралдарымен, психотроптық заттармен, олардың аналогтарымен сату мақсатынсыз заңсыз жұмыс істеу» бойынша тіркеліп, қылмыстық іс қозғалды. Қазіргі таңда сотқа дейінгі тергеу амалдары жүргізілуде. Оқиғаның толық мән-жайы анықталатын болады.
