Бүгін Түркістан облысында қар қатты жауып, күн күрт суыды. Салдарынан кейбір көліктер қарға батып, жүрісіне кедергі келтірді. Осы сәтте Түлкібас ауданы арқылы өтетін «Батыс Еуропа-Батыс Қытай» тас жолындағы полицейлер жүргізушілерге көмектесті.
Нақтырақ айтсақ, сағат 15:40 шамасында республикалық маңызы бар тас жолында келе жатқан «Газель» маркалы жүк көлігі жол жиегіне шығып кетіп, қар арасына кептеліп қалады. Дәл осы сәтте қызмет барысында жүрген полиция майоры Б. Амиров, полиция подполковнигі А.Қарақұловтар қозғалуға шамасы келмей жатқан көлікті көріп, дереу көмекке барады. Осылайша тәртіп сақшылары автокөлікті жол ортасына сүйреп алып шығады.
Өз кезегінде тәртіп сақшысының адал қызметіне риза болған тұрғын: «Қалың жаууына байланысты, жолдың оң жақ бетіне шығып, қарға тығылып қалдым. Полиция қызметкерлері көре сала бірден келіп, қауіпсіз жерге көлігімді тартып шығарды. Полицейлерге рақмет, еңбектеріңіз жана берсін!»- деп алғысын білдірді.
