Түркістан облысында карантин талаптарына байланысты күнделікті рейдтік жұмыстар жүргізілуде-деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Карантин режимін сақтамағандарға хаттамалар толтырылып, айыппұлдар салынып жатыр. Осы орайда Сарыағаш ауданының ауылында орналасқан базарлардың бірінде жергілікті тұрғынның бетпердесіз жүргені анықталды.
Сонымен қатар Шымкент-Жетісай тас жолының бойында орналасқан мейрамхана иесі тойханада «бесік той» рәсімін өткізгені белгілі болды. Осыған ұқсас тағы бір жергілікті тұрғын көше бойында орналасқан кафелердің бірін жалға алып «құдалық» жиынын өткізіп жатқаны туралы хабарлама келді. Сондай-ақ мобильді топпен атқарылған жұмыстар барысында Құркелес ауылдық округінде орналасқан тойхананың біреуі жұмыс істеп жатқаны анықталды.
Осы сияқты Сарыағаш қаласы арқылы өтетін Шымкент – Жетісай тас жолының бойында орналасқан мейрамханада 2 бірдей жергілікті тұрғын «тұсау кесер» рәсімін өткізіп жатқаны анықталды. Аталған жайттарға байланысты іс-құжаттар жинақталып Сарыағаш ауданындағы СЭС-ке жолданды.
Облыс полицейлері ескертеді, карантин кезінде той-жиындар, басқосулар, отбасылық, мерекелік, ұжымдық іс-шараларды ұйымдастыруға тыйым салынған. Оған қоса бетперделік режим мен арақашықтықты үнемі сақтау міндеттеледі. Сондықтан заңға баршамыз бірдей бағынайық!
ТО ПД-нің баспасөз қызметі
