Қазығұрт АПБ кезекші бөліміне жергілікті тұрғын бос жайылымнан 11 бас жылқы жоғалғаны туралы арызданған. Арызданушы азамат алғашқыда 3 күн бойы өзі іздеген. Содан еш нәтиже болмаған соң полицейлерден көмек сұрайды. Бұл жайт аудандық полиция бөлімінде тіркеліп, жоғалған жылқыларды іздеу жұмыстары басталды. Тәртіп сақшылары бірнеше мобильді топтарға бөлініп, жақын маңдағы барлық аумақтарды аралап, ауыл тұрғындарымен сұқбат жүргізді, базарлар мен мал тасымалдайтын автокөліктерді тексерді.
Жедел шаралар нәтижесінде бірнеше күннен кейін Қазығұрт ауданындағы шекаралық аймақтан яғни, 40 шақырым жердегі таулардың арасынан жылқы үйірі табылды. Табылған жылқылар заңды иесіне қайтарылып, жәбірленуші азамат полицейлерге алғысын білдірді.
«Мен 11 бас жылқымды жоғалтып, полиция қызметкерлерінен көмек сұрадым. Олар бірден жылқыларымды тапты. Барша полиция қызметкерлеріне алғысымды білдіргім келеді. Сіздерге үлкен рахмет! Өздеріңіздің арқаларыңызда жылқылар табылды!»- деді ауыл тұрғыны полицейлерге.
Өз кезегінде Түркістан облысының полицейлері қырағы болу және малды жайылымда қараусыз қалдырмау қажеттігін ескертеді, өйткені сіздің малыңыз барымташылардың оңай олжасына әп-сәтте айналуы мүмкін. Сондықтан мүмкіндігінше, үй шаруашылығын сенімді қоршаумен қоршап, малды таңбалау және сырғалау қажет. Мал жоғалған немесе ұрланған жағдайда өз бетінше іздеп, уақыт жоғалтпастан, дереу полицияның «102» телефонына хабарласыңыздар.
