Келес АПБ-ға Жетісай қаласының тұрғыны арызданды. Жәбірленуші қорықшының айтуынша, ол сол түні рейдтен кейін «Жібек жолы-Жетісай» тас жолының бойында, түнгі сағат 23:00 шамасында көлігінің доңғалағы тесіліп, көмекке шақырған адамын күтіп тұрған. Осы сәтте өтіп бара жатқан «Chevrolet Chance» маркалы көлік жанына тоқтап, ішінен бірнеше ер адамдар шығып, сөзге келместен бірден ұрып-соға жөнеледі. Осылайша бірнеше минут ішінде қорықшыға дене жарақатын салып, көлігіне материалдық шығын келтіреді. Содан күш көрсеткен жас жігіттер оқиға орнынан қаша жөнеледі. Осы сәтте қорықшы олардың арасындағы біреуін танып қояды. Соққының астында қалған ер адам бірден полицейлерге хабарлап, көмекке шақырады.
Тез арада оқиға орнына жеткен полицейлер, оқиғаның мән-жайын анықтауға кірісті. Жәбірленушіге дене жарақатын салғандарды ұстау мақсатында, жедел-іздестіру іс-шараларын жүргізді. Жақын аумақтарды мұқият қарап шығып, куәлардан сұрастырды. Келестік тәжірибелі тәртіп сақшыларынан құрылған жедел-тергеу тобы, небары 2-3 сағаттың ішінде күдіктілердің ізіне түсіп, оларды Қызыләскер ауылынан ұстады. Белгілі болғандай, күдікті бесеу бір-бірімен сыныптас, жас жігіттер болып шықты. Аталған жайт ҚР ҚК-нің 293-бабы «Бұзақылық» бойынша тіркелді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Тәртіп сақшылары күдіктілерден жауап алу барысында, олардың біріне сол күні түнде, сол жол бойында басқа біреулер тиіскен болып шықты. Содан бұл да өзінің достарын ертіп келіп, қорықшыны өзіне тиіскен адаммен шатастырып, күш көрсеткендерін жеткізді. Қазіргі таңда жәбірленушінің дене жарақатына байланысты сот-медициналық сараптама тағайындалды. Зерттеу қорытындысына қарай, заңды шешім қабылданатын болады. Оқиғаның толық мән-жайы анықталуда.
Өз кезегінде Түркістан облысының полицейлері азаматтарға қоғамдық орында тәртіпті бұзбауға кеңес береді. Егер де, сіз, осындай оқиғалардың құрбаны немесе куәсі болсаңыз полицейлерге хабар беріңіз!
