Төлеби АПБ-ға аралас заттар дүкен иесі, жергілікті тұрғын арызданды. Кәсіпкердің айтуынша, сағат 00:00 шамасында оның дүкеніне белгісіз біреу есігін бұзу арқылы заңсыз кіріп, кассада тұрған 100 мың теңге ақшасын жымқырып кеткен. Аталған жайт ҚР ҚК-нің 188-бабы «Ұрлық» бойынша тіркеуге алынды.
Аталмыш ұрлық қылмысы бойынша Төлеби АПБ қызметкерлері жедел-іздестіру іс-шарасын жүргізді. Полицейлер барлық қажетті шараларды іске асырып, күдіктінің жеке басын анықтады. Оны тұрғылықты мекенжайынан ұстап, АПБ-ға жеткізді. Дүкенге ұрлыққа түскен күдікті жас азамат сол дүкеннің тұрақты келушісі болып шықты.
Осы қылмыстық істің мән-жайын және күдіктінің басқа да қылмыстарға қатысы бар-жоғын анықтау мақсатында, тәртіп сақшылары жүйелі жұмыстарды атқаруда. Қазіргі таңда сотқа дейінгі тергеу әрекеттері жүргізілуде — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Түркістан облысының полицейлері тұрғындарға өздеріңізге тиесілі сауда орындарын, басқа да ойын-сауық мекемелеріне арнайы дабылқаққыш пен бейнебақылау камераларын орнатуға кеңес береді.
