Түркістан қалалық ПБ-ға учаскелік полицейлердің бірінен хабарлама келіп түскен. Онда Түркістан қаласының көшесінің бірінде ер адамның жол бойында мас халде жатқаны туралы көрсетілген.
Хабарды алған тәртіп сақшылары оның жеке басын анықтау мақсатында бірден ПБ-ға жеткізіп, қол саусақ іздерін алу барысында, тұрғынның сырт киімінің сол жақ қалтасынан жасыл түсті өзіне тән иісі бар есірткі затына ұқсас өсімдік анықталды — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Күдікті ер адамнан айғақты зат тәркіленіп, сараптамаға жолданды. Сараптаманың қорытындысына сәйкес, күдіктіден тәркіленген зат «марихуана» екендігі анықталды. Қазіргі таңда күдіктіге қатысты ҚР ҚК-нің 296-бабы, яғни «Есірткі, психотроптық заттармен, сол тектестермен өткізу мақсатынсыз заңсыз жұмыс істеу» қылмыстық құқық бұзушылығы бойынша сотқа дейінгі тергеу амалдары жүргізілуде.
Түркістан облысының полицейлері өз кезегінде азаматтарға есірткі заттарын сақтау және заңсыз айналымы үшін қылмыстық жауапкершілікке тартылатынын еске салады.
