Сарыағаш ауданы ПБ-нің кезекші бөліміне аудан тұрғынының бірі хабарласып, сырттай танысы есірткі заттарын сатумен айналысатыны туралы ақпарат берген. Аталған жайтты полиция қызметкерлері СДТБТ-ға ҚР ҚК 297-бабы «Есірткі құралдарын, психотроптық заттарды, сол тектестерді өткізу мақсатында заңсыз дайындау, қайта өңдеу, сатып алу, сақтау, тасымалдау, жөнелту немесе өткізу» бойынша тіркеді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Ақпарат алысымен Сарыағаш ауданы ПБ қызметкерлері жедел іздестіру жұмыстарына кірісті. Нәтижесінде күдікті азамат қала көшелерінің бірінен ұсталды. Тексеру барысында азаматтан айғақты зат ретінде өсімдік тектес есірткі заты бар қағаз орамасы тәркіленіп алынды. Сараптамаға сәйкес, тәркіленген есірткі жалпы салмағы 5 грамнан асатын «марихуана» болып шықты. Қазіргі уақытта аталған жайт бойынша сотқа дейінгі тергеу амалдары жүргізілуде. Бүгінгі таңда күдікті ер адам қамауға алынды.
Өз кезегінде Түркістан облысының полицейлері азаматтарға есірткі заттарының заңсыз айналымы мен таратқаны үшін қатаң қылмыстық жауапкершілік барын ескертеді. Сондай-ақ тұрғындарды зиянды әдеттерден бас тартуға және салауатты өмір салтын ұстануға шақырады.
