Бәйдібек аудандық полиция бөліміне жергілікті тұрғын арызданды. Ол өзінің арызында қарамағындағы қойшысының «Ауди 100» маркалы көлігін заңсыз айдап кеткенін көрсеткен. Аталған жайт ҚР ҚК-нің 200-бабы «Автомобильдi немесе өзге де көлiк құралын жымқыру мақсатынсыз құқыққа сыйымсыз иеленіп алу» бойынша тіркелді. Түркістан облысы полицейлері бұл іс бойынша жедел іздестіру шараларын бастап кетті-деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Нәтижесінде полиция қызметкерлері күдіктіні 1 тәулікке жетпей Ордабасы ауданынан ұстады. Қазіргі таңда тергеу амалдары жүргізілуде. Тергеу барысында анықталғандай күдікті азамат көлікті ішімдік ішіп жүргізген. Сондай-ақ Ордабасы ауданында жолдың жағасында тұрған талды соғып, одан соң көлікті тастап қашып кеткен. Бүгінде күдіктінің бас шарасы қолхатта.
Түркістан облысының полицейлері автокөлік иелеріне сақ болуды және көліктерін қараусыз қалдырмауды ескертеді. Сондай-ақ, мүмкіндігінше автокөліктерді күзетілетін тұраққа қойып, күзет дабылымен жабдықтау қажет. Автокөлік ұрланған жағдайда тез арада полицияға 102 телефоны арқылы хабарласыңыз.
ТО ПД-нің баспасөз қызметі
