Түркістан облысы аумағында Полиция департаменті Есірткі қылмысына қарсы іс-қимыл басқармасының қызметкерлерімен «Дәрмек» жедел-профилактикалық іс-шарасы өткізілуде. Іс-шараның негізгі мақсаты — есірткі құралдарының, прекурсорлардың заңсыз айналымына тосқауыл қою, контрабандалық әкелу мен әкету, сондай-ақ бақылаудағы заттарды заңсыз айналымға шығару деректерін анықтау болып табылады.
Сонымен қатар, шара кезінде полицейлер, химия-фармацевтикалық, өнеркәсіптік, медициналық мекемелердің құрамында есірткі құралдары және психотроптық заттары бар дәрі-дәрмектерін заңсыз айналымға түсіруіне жол бермеу, осындай құқық бұзушылықпен айналысатын тұлғаларды анықтау бағытында қарқынды қызметтер атқаруда.
Атап айтсақ, облыс полицейлерімен «Дәрмек» жедел-профилактикалық іс-шарасының алғашқы тәулігінде 4 құқық бұзушылық анықталды. Оның ішінде 1 дерек есірткі сату бойынша (ҚР ҚК-нің 297-бабы 1-бөлігімен, Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, тасымалдау, оларды жөнелту не өткізу»). ҚР ҚК-нің 296-бабы 2-бөлігімен «Аса ірі мөлшердегі есірткі, психотроптық заттарды, сол тектерді өткізу мақсатынсыз заңсыз дайындау, қайта өңдеу, иемдену, сақтау» 2 дерек есірткі теріс қылығы анықталған — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
ҚР ӘҚБтК-нің 426-бабы «Фармацевтикалық қызметтің және дәрілік заттар мен медициналық бұйымдардың айналысы саласының қағидаларын бұзу» бойынша 1 жайт анықталған. Бұл жайт Төлеби ауданы Леңгірде орналасқан дәріханалардың бірінен айқындалды. Яғни мұнда дәріхана сатушысы, дәрігердің арнайы рұқсатынсыз сатылуға тыйым салынған «Трамадол» психотроптық дәрісін сатқаны белгілі болды.
Өз кезегінде Түркістан облысының полицейлері ескертеді, заңсыз әрекеттердің соңы әкімшілік немесе қылмыстық жауаптылыққа әкеліп соғады. Сондықтан жаман әдеттерден аулақ болыңыздар. Және тәртіп сақшылары, алдағы уақытта да есірткі заттарын қолданудың зияны туралы және жастарды салауатты өмір салтын ұстануға шақыратын шараларды ұймдастыруды назардан тыс қалдырмайды.
