Келес аудандық полиция бөліміне жергілікті тұрғын арызданды. Онда ер адам, өзіне тиесілі азық-түлік дүкеніне ұры түскенін хабарлады. Яғни, күдікті дүкеннің есігінің құлпын күштеп бұзып, заңсыз кіру арқылы кассадағы 30 мың теңге ақша мен бірнеше темекілерді, шоколадтарды, сондай-ақ 2 дана садақа жәшігіндегі ішінде анықталмаған шамадағы ақшаларды жымқырып кеткен. Аталған жайт ҚР ҚК-тің 188-бабы «Ұрлық» бойынша тіркеуге алынды.
Орын алған ұрлық қылмысын ашу мақсатында, Келес АПБ-нің тәжірибелі қызметкерлерінен жедел-тергеу тобы құрылып, күдіктіні ұстауға бағытталған барлық қажетті шараларды іске асырды. Куәлардан сұрастырды. Бейнебақылау камералары тексерілді. Нәтижесінде тәртіп сақшылары күдіктінің жеке басын анықтап, оны тез арада полицияға жеткізді. Анықталғандай, ол өткен жылы дәл осындай ұрлық жасап, соттың үкімімен 3 жылға бас бостандығынан шектелген жас жігіт болып шықты.
Белгілі болғандай, оңай жолмен ақша табуды әдетіне айналдырған күдікті, өзінің соттылығына қарамастан қайта ұрлық жасаған. Дүкеннің есігін бұзу арқылы кіріп, бөтеннің мүлкін жымқырған. Қазіргі таңда күдікті қамауға алынды. Сотқа дейінгі тергеу амалдары жүргізілуде — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Түркістан облысының полицейлері тұрғындарға ұрлықтың алдын алу үшін барлық қажетті сақтық шараларын сақтауды ескертеді. Үйлеріңізге, дүкендеріңізге мүмкіндігінше бейнебақылау камералары мен дабылқаққыш орнатыңыздар. Сондай-ақ есіктеріңізге берік құлыптар, терезелеріңізге темір торлар жасатыңыздар.
