Мақтаарал ауданы ПБ-ға жергілікті тұрғындардың бірінен арыз түскен. Онда жәбірленуші азамат өзінің үйіне белгісіз біреу кіріп, компьютерін және ұялы телефонымен қоса ақшасын тонап кеткендігін көрсеткен. Келтірілген жалпы шығын көлемі 250 000 теңге. Полиция қызметкерлері аталған жайтты ҚР ҚК 191-бабы «Тонау» бойынша СДТБТ-ға тіркеді.
Оқиға орнына бірден полицияның жедел-тергеу тобы шығып, сұрастыру жұмыстарын жүргізді. Жақын аймақтарды және күдіктінің басқа баруы мүмкін жерлерді қарап шықты. Тәртіп сақшыларының тәулік бойы үзіліссіз жүргізілген жедел-іздестіру іс-шараларының нәтижесінде, күдікті екі ер азамат ұсталды. Олар жергілікті тұрғын болып шықты. Полицейлер құрықталған күдіктілерді бірден ПБ-ға жеткізді. Қазіргі таңда күдікті ер азаматтар қамауға алынып, тергеу амалдары жүргізілуде.
Белгілі болғандай күдіктілердің бұдан басқа тағы 5 пәтер ұрлығына қатысы бары анықталды. Онда тұрғындардың түрлі техникалық бұйымдары мен көзге түскен құнды заттарының барлығын жымқырған. Осылайша оларға келтірілген жалпы шығын көлемі 1 000 000 теңгеге жуық. Бүгінгі күні полиция қызметкерлерінің қырағылықтарының арқасында ұрланған заттар тәркіленіп алынып, заңды иелеріне қайтарылды.
Өз кезегінде Түркістан облысының полицейлері тұрғындарды сақ болуға шақырады. Үй жайларыңызды мықты құлыппен бекітіп, жарықтандыру құралдарын мейілінше көптеп қоюға кеңес береді. Егер де, сіз, осындай ұрлық жайтының құрбаны немесе куәсі болсаңыз бірден «102» нөміріне хабарласыңыз.
