Кентау қаласы ПБ-ның полиция қызметкерлері жол қозғалысы ережелерінің сақталуын бақылау мақсатында, күнделікті жол-көлік оқиғаларының алдын алу бойынша тұрақты түрде іс-шараларды жүргізуде. Осындай шара барысында Кентау ПБ полицейлері қызметтік міндетін атқару барысында ішімдік ішіп, көлік басқарған жүргізушіні анықтады.
Яғни полицейлердің рейді кезінде түнгі сағат 00:30 шамасында «Ваз 211440» маркалы автокөлігі «Ваз 2101» автокөлігімен соқтығысып, жол көлік оқиғасын жасағаны белгілі болды.
Осылайша оқиға орнын тексеру кезінде полицей жүргізушінің мас халде болуы мүмкін екеніне күдіктенді. Содан соң «Ваз 211440» көлік жүргізушісін медициналық сараптамадан өткізді. Қорытындысы бойынша автокөлік жүргізушісінің «ауыр» дәрежедегі мас күйде болғаны расталды. Жүргізушінің құжаттарын тексеру барысында аталған көлік иесі 2021 жылдың қаңтар айында Кентау қалалық сотының қаулысымен ҚР ӘҚБтҚ-нің 608-бабына сәйкес көлік басқару құқығынан 3 жылға айырылғаны анықталды — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Бүгінде жүргізушінің жүргізу куәлігінің жоқтығына қарамастан екінші рет мас халде автокөлік басқарғаны үшін ҚР ҚК-нің 346-бабы «Көлік құралдарын басқару құқығынан айырылған және алкогольдік, есірткілік және (немесе) уытқұмарлық масаң күйдегі адамның көлік құралын басқаруы, сол сияқты көлік құралын басқаруды осындай адамға беру немесе көлік құралын осындай адамның басқаруына жол беру» бойынша қылмыстық іс қозғалды. Қазіргі таңда аталған жайтқа байланысты тергеу амалдары жүргізілуде. Күдікті қамауға алынды.
Өз кезегінде, Түркістан облысының полицейлері жүргізушілер мен жаяу жүргіншілерді жол қозғалысы ережелерін қатаң сақтауға шақырады. Автокөлікке мас халде отырмаңыз, бұның соңы жазатайым оқиғалар мен өлімге әкеп соқтыруы мүмкін. Қашықтықты және маневр жасау ережелерін сақтау, жылдамдықты асырмау және қарсы жолаққа шықпау қажет.
ТО ПД баспасөз қызметі
