Түлкібас АПБ-нің кезекші бөліміне жергілікті тұрғын арызданып, оның автокөлігіне белгісіз тұлға ұрлыққа түскенін хабарлаған-деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Жәбірленушінің айтуынша, түскі уақытта аудан орталығындағы көшелердің бірінде автоұры оның «Мазда 626» көлігінің есігі ашық тұрғанын пайдаланып, салоннан спорттық киім мен аяқ киімін жымқырып кеткен. Келтірілген шығын көлемі 40 мыңнан астам теңгені құрады. Аталған жайт ҚР ҚК 188-бабы «Ұрлық» бойынша Түлкібас АПБ-нің СДТБТ-не тіркелді.
Оқиға орнына келген аудандық полиция бөлімінің қызметкерлері бірден күдіктілерді анықтау бойынша қажетті іс-шараларға кірісті. Жедел уәкілдер учаскелік инспекторлармен бірге жақын маңдағы барлық аумақтарды, аулаларды мұқият аралап, бейнебақылау камераларын тексеріп, куәгерлерден жауап алды. Жедел-іздестіру іс-шараларының нәтижесінде Түлкібас АПБ-нің полицейлері күдіктіні ұстады. Ол өз ісін толық мойындаған жергілікті тұрғын болып шықты.
Тергеу барысында жас жігіттің бөтеннің мүлкін ұрлаудың 4 дерегіне қатысы бар екендігі анықталды. Сол күні автоұры басқа жәбірленушіге тиесілі «Мерседес» көлігін ашып, 3 мың теңге мен құжаттарын ұрлап кеткен. Сондай-ақ ұры саябақ аумағынан құрылыс құралдарын ұрлап, жәбірленушілерге жарты миллион теңгеге жуық шығын келтірген. Ұрланған заттардың бір бөлігі заттай айғақ ретінде тәркіленіп, заңды иелеріне қайтарылды.
Қазіргі уақытта аталған жайттар бойынша сотқа дейінгі тергеу амалдары жүргізілуде. Күдікті қолхатта. Полиция қызметкерлері ұсталған адамның басқа да осыған ұқсас қылмыстарға қатысы бар-жоғын анықтауда.
Өз кезегінде Түркістан облысының полицейлері азаматтарға қырағы болуға және автокөліктері мен бағалы заттарын қараусыз қалдырмауға кеңес береді. Сондай-ақ, автомобильдердің есіктері мен терезелерін жауып, ақша мен құжаттарды өзіңізбен бірге алып кетуге кеңес береді. Автокөлік күзет дабылымен жабдықтап, күзетілетін тұраққа қою қажет. Мүмкіндігінше абай болыңыз және құнды заттарды қоғамдық орындар мен көшелерде қалдырмаңыз. Егер сіз бөтеннің мүлкін ұрлаудың құрбаны болсаңыз, тез арада полицияға 102 нөміріне хабарласыңыз.
ТО ПД-нің баспасөз қызметі
