Отырар аудандық полиция бөліміне жергілікті тұрғыннан арыз түскен. Онда жәбірленуші азаматтың аудан орталықтарының бірінде орналасқан тамақтану орнынан белгісіз азамат 1 қорап тауық етін ұрлап кеткендігі туралы көрсетілген. Келтірілген шығын көлемі 15 000 теңге. Полиция қызметкерлері аталған жайтты ҚР ҚК-нің 188-бабы «Ұрлық» бойынша тіркеді.
Содан соң тәртіп сақшылары хабар түсісімен оқиға орнына жедел жетті. Орын алған ұрлық қылмысын ашуға бағытталған шараларға бірден кірісті. Айналаны толық бақылап, көше бойындағы барлық дүкен, дәмханалардың бейнекамераларын мұқият тексерді. Полиция қызметкерлерінің тыңғылықты жүргізілген жұмыстарының нәтижесінде бірнеше мекемелердің бейнебақылау камерасына түсіп қалған егде жастағы азамат анықталды. Полицейлер жинақталған ақпарат көздері бойынша күдікті азаматты тұрғылықты жерінен қолға түсірді. Ол жергілікті тұрғын болып шықты. Қазіргі таңда аталған жайтқа байланысты сотқа дейінгі тергеу амалдары жүргізілуде — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Белгілі болғандай жәбірленуші азамат тамақтану орнына 1 қорап, яғни 19 дана тауық етін алдырған. Содан соң оның мұзын еріту мақсатында есік алдындағы күн көзіне қойған. Осы сәтте жұмыстан үйіне бет алған күдікті, тауық етін көріп, алып кетуге арам ойы туындаған. Осылайша өзінің басқаруындағы велосипедтің артқы бөлігіне тауықты салып, пайдасына асыру мақсатында алып кеткен.
Түркістан облысы полицейлері дүкенді ашық күйде қалдырмай, есік-терезелердің жабылғандығына толық көз жеткізіп алуға кеңес береді. Ұрлық орын алған сәтте, тез арада полицияның «102» телефоны арқылы хабар беріңіздер деп ескертеді.
ТО ПД-нің баспасөз қызметі
