Өсіруге, сақтауға, сатуға заңмен тыйым салынған есірткіге қатысты қылмыстардың алдын алып, болдырмау мақсатында республика көлемінде 24-28 мамыр күндері аралығында «Дәрмек» іс-шарасы өткізілуде. Осы профилактикалық шараның 2 тәулігінде Түркістан облысы Полиция департаментінің Есірткі қылмысына қарсы іс-қимыл басқармасымен 7 қылмыс анықталды. Оның ішінде есірткі сату бойынша 2 дерек, аса ірі көлемде сақтау және тасымалдау бойынша 1 дерек, улы заттарды, психотроптық заттарды заңсыз сату бойынша 2 дерек, құрамында есірткі заты бар өсімдіктерді заңсыз өсірумен айналысқан 2 дерек. Ал, облыс аумағындағы дәріханаларда рецептсіз дәрілерді сату бойынша 4 әкімшілік құқық бұзушылық жайты анықталып, оларға әкімшілік хаттамалар толтырылды.
Мәселен, Жетісай АПБ КПБ-нің қызметкерлеріне жергілікті тұрғынның бірі үйінің ауласында есірткі затын өсіретіндігі жөнінде ақпарат келіп түскен. Аталған жайт бойынша тәжірибелі тәртіп сақшылары жедел-іздестіру шараларын жүргізді. Есірткі егуде деген күдікпен жергілікті тұрғын анықталды. Тінту жүргізу барысында оның үйінің ауласында орналасқан егістік алқаптан есірткіге ұқсас 4 түп өсімдік айғақты зат ретінде табылып алынды. Сараптама тағайындалды. Оның қорытындысына сәйкес зерттеуге ұсынылған 4 (төрт) түп есірткі тектес өсімдіктің «Ұйықтататын көкнар» екені айқындалды — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Аталған жайт сотқа дейінгі тергеп-тексерудің бірыңғай тізіліміне ҚР ҚК-нің 300-бабының 1-бөлігімен «Құрамында есiрткi заттар бар, өсiруге тыйым салынған өсiмдiктердi заңсыз егіп-өсіру»тіркеліп, қазіргі таңда тергеу амалдары жүргізілуде. Күдіктінің бас шарасы «міндеттемеде».
Облыс тұрғындарына ескертеміз, есірткі атаулыға мүлде жоламаңыздар! Өз саулықтарыңыз үшін салауатты өмір салтын қалыптастырып, жаман әдеттерден аулақ болыңыздар.
ТО ПД-ның баспасөз қызметі
