Бәйдібек аудандық полиция бөлімінің бастығы полиция полковнигі Дауыл Панзабеков мұражай қызметкерін «Алғыс хатпен» марапаттады. Яғни кезекші бөлімнің бастығы полиция майоры Қанат Ахметов ауданның бас полицейінің марапатын өз иесіне арнайы барып табыстады. Бұл шара халықаралық музей күніне орай ұйымдастырылды. Бәйдібек ауданы Шаян ауылында орналасқан Аппақ Ишан мұражайының экскурсия меңгерушісі Жандос Құрманбековты төл мерекесімен құттықтай отырып, полиция полковнигі Дауыл Панзабековтың: «Сізге полиция бөліміне үнемі қолдау білдіріп, бірлесіп жұмыс істеп жүргеніңізге алғыс айтамыз! Сіздің, өскелең ұрпақтың игілігі үшін полицейлермен мызғымас ынтымақтастық орнатқаныңызға құрметпен қараймыз! Жастардың рухани жаңғыруы жолындағы қалтқысыз қызметіңізді жоғары бағалаймыз!»-деген ыстық ықыласын жеткізді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Еліміздің тарихын халыққа танытып, тәуелсіздігімізді тұғырлы ету жолындағы жоспарлар мен істерді ел ішіне жеткізуде осы — мұражай қызметкерлерінің еңбегі ерен. Олардың қызметі маңызды да жауапты. Табиғи және мәдени жәдігерлерді сақтай отырып, өткен мен келешекті байланыстыру, халықтар арасында өткен заманның мұраларын танымал ету оңай іс емес.
Өз кезегінде бәйдібектік полицейлер, аталмыш мұражайға тұрақты келіп тұратынын айтқымыз келеді.Себебі, бұл — полиция қызметкерлері бойында патриотизмді одан ары күшейтіп, эстетикалық мәдениетті қалыптастырады. Өйткені музейге келіп, ұлттық құндылықтармен танысқан тәртіп сақшылары ерекше әсер алғандарын айтып жатады.
ТО ПД-ның баспасөз қызметі
