Мақтаарал аудандық полиция бөлімінің кезекші бөліміне Атамекен шекара бекетінде есірткі сақтаған күдіктінің ұсталғаны туралы хабарлама келіп түсті. Оқиға орнына бірден аудандық полиция бөлімінің жедел-тергеу тобы шықты.
Полиция анықтағандай, Тәжікстаннан келген жүк көлігін тексеру кезінде Икар есімді қызметтік ит жүргізушіден тыйым салынған заттарды тапты. Жедел уәкілдер күдіктіні, яғни Тәжікстан азаматын тінту кезінде қалтасынан өсімдік тектес есірткіге ұқсас заты бар ораманы тәркіледі. Тәркіленген заттай дәлелдемелер сараптамаға жіберілді. Қорытындыға сәйкес, есірткі заты жалпы салмағы шамамен 1 грамм болатын гашиш болып шықты — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Аталған жайт ҚР ҚК-нің 296-бабы «Есірткі, психотроптық заттармен, сол тектестермен өткізу мақсатынсыз заңсыз жұмыс істеу» бойынша СДТБТ-де тіркелді. Күдікті қолхатта. Сотқа дейінгі тергеу амалдары жүргізілуде.
Өз кезегінде Түркістан облысының полицейлері есірткіні заңсыз сақтау мен таратқаны үшін қатаң қылмыстық жауапкершілік қарастырылғанын ескертеді. Тәртіп сақшылары азаматтарды салауатты өмір салтын ұстануға және есірткі қолданбауға шақырады. Егер, сіз де, есірткі құралдарының заңсыз айналымына байланысты қылмыстар туралы қандай да бір ақпарат болса, бұл туралы полицияға «102» телефоны бойынша хабарлаңыз.
ТО ПД-ның баспасөз қызметі
