Келестік полицейлер акция барысында 4 қорғау нұсқамасын шығарды

«Отбасындағы зорлық-зомбылыққа жол жоқ!» тақырыбында өткізіліп жатқан акция аясында Келес АПБ-нің әйелдерді зорлық-зомбылықтан қорғау тобының инспекторы полиция майоры Эльмира Есенқұлова мен әлеуметтік сүйемелдеу оталығы, ішкі саясат, жастар орталығы қызметкерлері бірлесіп, тұрғындарға 100-ге жуық арнайы түсіндірме қағаздарын таратты.
Жалпы Келес ауданы бойынша 14 жайсыз отбасының жай-күйі тексеріліп, түсіндірме жұмыстары жүргізілді. 20-22 мамыр күндері ұйымдастырылған акцияның 3 тәулігінде 4 қорғау нұсқамасы шығарылды, оның ішінде 3-еуі Жергілікті полиция қызметі учаскелік полиция инспекторларымен, 1-еуі Әйелдерді зорлық зомбылықтан қорғау инспекторымен алынған.
Мысалы, Келес АПБ-ға жергілікті тұрғын арызданып, күйеуі отбасы тыныштығын бұзып жүргенін жеткізген. Әйел полицейлерден өзін қорғауын сұраған. Аталған азаматшаға полиция майоры Эльмира Есенқұлова құқықтық кеңес беріп, оның жұбайына қатысты «қорғау нұсқамасын» шығарды — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Одан бөлек полицейлер әрдайым мұқтаж жандар мен көпбалалы отбасыларға арнайы барып, профилактикалық жұмыстарды жүргізіп, құқықтық кеңестер беріп отырады. Сондай-ақ Келес ауданының «Келес келбеті» атты газетіне іс шара бойынша хабарландыру, профилактикалық мақалалар жарияланды.
ТО ПД-ның баспасөз қызметі