ҚР ІІМ бұйрығына сәйкес 2021 жылдың 20 сәуірінен бастап республика көлемінде «Заңсыз сақталған атыс қаруын, оқ-дәріні және жарылғыш заттарды азаматтардан сатып алу» акциясы өткізілуде. Осы бағытта Түркістан облысында тәртіп сақшыларымен қарқынды жұмыстар атқарылуда. Тұрғындарға барынша түсіндірме жұмыстары жүргізілуде. Көпшілікке өз еркімен тіркелмеген қаруларды өткізіп, сыйақы алуға болатындығы айтылуда. Өз кезегінде бірнеше облыс тұрғындары қаруларын өткізіп, акцияда белсенділік танытуда.
Мысалы, Келес аудандық полиция бөліміне 3 тұрғын өздерінің аталарынан қалған қаруларды өткізген. Ошақты ауылдық округінің тұрғыны Нұрлыбек Садуақас, ИЖ маркалы екі тегіс ұңғылы 16 калибрлі аңшы мылтығын өз еркімен әкеліп, полицейлерге тапсырған. Келесі Алмас Шыматов есімді тұрғын, өзінің атасынан қалған ТОЗ маркалы 1тегіс ұңғылы 16 калибрлі мылтығын өткізді. Ал, үшінші Айгүл есімді тұрғын еш жерде тіркелмеген 1 ұңғылы 16 калибрлі қаруын әкеліп, өткізген. Қазіргі уақытта мылтықтар сот-баллистикалық сараптамаға жіберілді, нәтижесінде азаматтарға ақшалай қаражат төлеу туралы шешім қабылданады — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Ескерте кететін жайт, қару-жарақ заттарын өз еркімен тапсырғаны үшін, мемлекет қарудың әрқайсысы үшін тиісті төлемін жасайды. Ал, сыйақы төлеу қару-жарақ заттарын тапсырған азаматтар ұсынған шоттарға аудару жолымен жүзеге асырылады. Тіркелмеген атыс қаруын, оқ-дәрілер мен жарылғыш заттарды өз еркімен тапсырған азаматтар қылмыстық және әкімшілік жауапкершіліктен босатылады.
Сондықтан, тұрғындар заңсыз сақтап жүрген ата, әкеңізден қалған, тауып алған тіркелмеген қаруларыңыз болса, тиісті органға тапсырыңыздар.
ТО ПД-ның баспасөз қызметі
