Түркістан облысының полицейлері спирттік ішімдік ішіп көлік басқарғанды ұстады

Сарыағаш АПБ-нің учаскелік полиция инспекторы полиция капитаны Дәурен Оразбаев өзіне белгіленген аумақта профилактикалық жұмыстар жүргізді. Аталған жұмыс барысында Сарыағаш қаласы көшелерінің бірінде «Mersedes» маркалы автокөлік бағдаршамның қызыл түсінен өтіп кеткендіктен күдік тудырған. Өз ісіне тиянақты уческелік полицей жол ережесін бұзған автокөліктің ізіне түсіп жүргізушіні тоқтатады.
Содан жүргізушінің жеке басын анықтап, автокөлікке қатысты құжаттарын анықтау барысында Сарыағаш аудандық әкімшілік сотының қаулысымен 6 жылға автокөлік басқару құқығынан айырылғаны анықталды. Сонымен қатар жүргізуші куәлігінен айырылса да тағы да спирттік ішімдік ішіп, көлік басқарғаны белгілі болды. Аталған жайтты полицейлер ҚР Қылмыстық Кодексінің 346-бабы «Көлік құралдарын басқару құқығынан айырылған және алкогольдік, есірткілік және (немесе) уытқұмарлық масаң күйдегі адамның көлік құралын басқаруы, сол сияқты көлік құралын басқаруды осындай адамға беру немесе көлік құралын осындай адамның басқаруына жол беру» бойынша тіркеуге алды. Қазіргі таңда кінәлі деп танылған күдікті азамат қамауға алынды — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Өз кезегінде Түркістан облысының полицейлері жүргізушілер мен жолаушыларды жол қозғалысы ережелерін қатаң сақтауға шақырады. Мас күйінде рульге отырмаңыз, бұл қалпына келтірілмейтін салдарға әкелуі мүмкін. Сондай-ақ, қашықтықты және маневр жасау ережелерін сақтау, жылдамдықты асырмау және қарама-қарсы қозғалыс жолағына шықпау қажет. Жүргізушілер есіңізде болсын: жол қателіктерді кешірмейді, жол ережесін сақтаңыз, бұл сіздің өміріңіз бен жолаушыларыңыздың денсаулығын сақтауға көмектеседі.
Түркістан облысы ПД баспасөз қызметі.