«Бір экспонаттың тарихы»

Ішкі істер министрлігіне қарасты жоғары оқу орындарының курсанттары Түлкібас аудандық мәдениет үйінің ішінен ашылған мұражайға онлайн экскурсия жасады.
«Бір экспонаттың тарихы» аясында өткен шараға ҚР ІІМ қарасты М.Есболатов атындағы Алматы академиясының, Б.Бейсенов атындағы Қарағанды академиясының, Ш.Қабылбаев атындағы Қостанай академиясының, М.Бөкенбаев атындағы Ақтөбе заң институтының 3 және 4 курс студенттері қатысты.
Бұл жобаның басты мақсаты — халықтың арасында ішкі істер органдары қызметінің қалыптасуы мен дамуын жан жақты насихаттау, тарихын білуге дағдыландыру, жасөспірімдерге аға ұрпақты таныстыру.
Іс-шарада тарих пен дәстүр, ерлік пен батылдық кеңінен насихатталды.
Ардагер полицейлердің еңбек жолдары үлгі етіліп, ерен еңбектері айтылды. Курсанттар соғыс және еңбек ардагерлері туралы қызықты деректер топтамасымен танысты. Мұрағаттық құжаттар мен экспозицияларды, фотоқұжаттарды көрді.
Бұрынғы үлгідегі «милиция» нысанды киім үлгілері, спорт жетістіктерінің түрлі медальдары мен дипломдары қойылған арнайы бұрышты тамашалады — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Сондай-ақ, мұражай материалдары мен экспонаттар, көрмелер таныстырылды. Ішкі істер органдары қызметкерлерінің оң имиджін насихаттауға бағытталған бейнероликтер көрсетілді.
Айта кетейік, Түлкібас аудандық мәдениет үйінің жанынан ашылған мұражайда бірнеше жылдан бері тарихи экспонаттар жинақталуда. Онда күнделікті мәдени-ағартушылық, экскурсиялық және көрме жұмыстары ұйымдастырылады.
ТО ПД-нің баспасөз қызметі