Келес аудандық полиция бөлімінің қызметкерлері жол-көлік оиғаларының алдын алу, болдырмау мақсатында, күнделікті рейдтік-профилактикалық жұмыстарды өткізіп келеді. Осындай кезекті жұмыс аптасында полицейлер, ішімдік ішіп, көлік тізгіндеген 4 жайтты анықтап, болуы мүмкін жол апаттарына тосқауыл қойды.
Мәселен, Келес АПБ ЖПҚ ППТ-ның қызмет инспекторы полиция аға лейтенанты Жандос Полатов аудан көшелерінің бірінде «Даево ситилло» маркалы көліктің жүргізушісі қауіпсіздік белдігін тақпай бара жатқанын көріп, тоқтауын сұрайды. Алайда, жас жүргізуші полицейдің белгісіне қарамастан, жүйтки жөнеледі. Ал, полицей болса соңынан жетіп, құжаттарын тексереді. Осы сәтте жүргізушінің мас болуы мүмкін екенінен күдіктеніп, медициналық куәландырудан өткізеді. Зерттеудің нәтижесінде жас жігіттің «жеңіл дәрежелі» мас халде екендігі анықталады.
Осыған орай аталған жайт ҚР ӘҚБтК-нің 608-бабы бойынша тіркеуге алынып, жинақталған іс-құжаттары сотқа жолдану үстінде. Оған қоса ҚР ӘҚБтК-нің үш бірдей бабымен хаттама толтырылады: Олар 593-баптың 2-бөлігі, 230-баптың 2-бөлігі, 590-баптың 9-бөлігі.
Сондай-ақ осы тектес, мас халде темір тұлпар тізгіндеудің үш жайты орын алған. Оның біреуінде «Урал» мотоциклі, одан бөлек «Тойота камри» маркалы 2 көліктің жүргізушісі де масаң күйде көлік басқарғаны анықталып, ҚР ӘҚБтК-нің 608-бабы «Мас халде автокөлік басқару» бойынша әкімшілік хаттама толтырылған — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Түркістан облысының полицейлері мас күйінде көлік жүргізгені үшін әкімшілік қана емес, қылмыстық жауапкершілік те қарастырылғанын ескертеді. Сонымен қатар тәртіп сақшылары тұрғындарға жолда абай болуға, жол ережесін сақтауға, ең бастысы алкогольдік немесе есірткілік мас күйінде көлік жүргізбеуге кеңес береді.
ТО ПД-нің баспасөз қызметі
