Бәйдібек аудандық полиция бөліміне Қызылжар ауылының тұрғыны шағымданады. Ер адамның айтуынша, оның қора жанына байлап қойған көкпар шабатын жылқысы белгісіз жағдайда шығып кетіп жоғалған. Аталған жүйрік аттың бағасы базар нарқымен 1 000 000 теңгеден асады. Өзі 1 күн бойы ары-бері іздеп таба алмағаннан кейін, полицейлерден көмек сұрайды. Хабар алысымен тәжірибелі тәртіп сақшылары әрекет етіп, іздеуге кіріседі. Куәгерлерден жауап алып, жақын аумақтарды аралайды. Жол талғамайтын қызметтік көлікпен тау-тасты мұқият қарап шығады. Соның нәтижесінде 20 шақырым қашықтықтан басқа жылқылардың арасынан тұрғынның жоғалған жылқысын табады. Содан жылқы заңды иесіне қайтарып алғыс алады.
Көкпарға шығатын жылқының егесі Байжан Нұрмұхаммед өз сөзінде: «Полицейлерге, мың рақмет! Жоғалған жылқымды 2 сағат ішінде тауып берді. Негізі бірінші өзім іздеп шығып едім, менің іздеуім сәтсіз болды. Ал, полицейлер не дегенмен өз істерінің нағыз маманы екендіктерін дәлелдеді. Бәйдібектік тәртіп сақшыларына рақметімді айтамын!»-деп, шынайы ризашылығын білдірді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Өз кезегінде облыс полицейлері қора-жайларды мықтап бекітіп, мал жайылымында малдарды қараусыз қалдырмауға және ұқыпты болуға шақырады. Сондай-ақ төрт түліктерді уақытылы таңбалап, енін салдыртуы тиіс. Мал қораларды да жақсылап қоршап, бекітіп, жарықтандырған жөн. Үй жануарлары жоғалса немесе ұрланса, уақыт жоғалтпай полиция бөліміне тез арада хабарласыңыздар. Бұл малыңыздың ерте табылуына, қылмыс болса, ізін суытпай ашуға ықпал етпек.
ТО ПД-ның баспасөз қызметіф
