Түркістан облысының полицейлері күннің ыстығы мен суығына қарамастан күні-түні қызметте жүреді. Оның ішінде жол-көлік оқиғаларының алдын алу, болдырмау бағытында қарқынды жұмыс атқаруда, сондай-ақ қиындыққа тап болған жүргізушілер мен жолаушыларға көмектесуді де дәстүрге айналдырған. Өз кезегінде полицейлерден көмек алған тұрғындар шынайы ризашылығын жеткізуде.
Мысалы, Шымкент-Түркістан тас жолы бойында іссапардан келе жатқан әйел жүргізуші мен оның құрбысы Түркістан ҚПБ қызметкеріне өздерінің алғыстарын жаудырды. Нақтырақ айтсақ, ұялы телефон байланыс ұстамайтын айдалада олардың көліктері бұзылып қалады. «Біздің көлігіміз жол бойында бұзылып қалды. Сол мезетте жанымыздан қаншама көліктер өтті, алайда ешқайсысы көмектеспеді. Сол аралықта полицейдің қызметтік көлігі қасымызға тоқтап, жағдайымызды сұрап, қандай да бір көмек керек па деп сұрады. Біздің көлігімізді жөндеп, Түркістанға жетуімізге ықпал етті. Барлығы үшін Жандос есімді полицейге рақметімізді айтамыз!»-деп өздерінің ризашылықтарын білдірді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Белгілі болғандай, аталған полицей — Түркістан ҚПБ ЖПҚ ППР қызмет инспекторы полиция аға лейтенанты Жандос Таймаханұлы.
Ауа райының қолайсыздығына байланысты жол бойында адамдардың қалып кетпеуін қамтамасыз еткен полицейлердің бұл — бір ісі ғана. Тәртіп сақшылары мұндай қаншама тұрғындарға қолдарынан келгенше көмек беріп, діттеген жеріне жеткізіп тастауда. Әрбір жанның үйіне аман-есен оралуы бағытында қызмет атқаруда.
ТО ПД-ның баспасөз қызметі
